Հայաստանի նախագահ, «Հայաստան» համահայկական հիմնադրամի հոգաբարձուներու խորհուրդի նախագահ՝ Արմէն Սարգսեան աշխատանքային հանդիպում ունեցած է Հիմնադրամի գործադիր տնօրէն՝ Հայկակ Արշամեանի հետ:
Հանդիպման քննարկուած են հիմնադրամի կողմէ իրագործուող եւ առաջիկայ ծրագիրները, անոնց կարգին՝ Արցախի մարդասիրական օժանդակութեան նախագիծերը:
Ըստ նախագահի գրասենեակին, Արմէն Սարգսեան կարեւորած է աշխարհասփիւռ հայութեան հանգանակած եւ «Հայաստան» համահայկական հիմնադրամին նուիրաբերած միջոցներու արդիւնաւէտ, պատասխանատու եւ նպատակային ծախսումը, ծրագիրներու իրագործման ընթացակարգերու եւ ժամկէտներու խստագոյնս պահպանումը, հիմնադրամի գործունէութեան թափանցիկութիւնն ու հաշուետուողականութիւնը եւ կառոյցի հանդէպ վստահութիւնը:
Սարգսեան նշած է, որ առաջիկային կը նախատեսէ հրաւիրել հոգաբարձուներու խորհուրդը արտահերթ նիստի՝ Հիմնադրամի կառավարման եւ գործունէութեան հետ կապուած խնդիրները քննարկելու եւ լուծումներ գտնելու նպատակով:
Յիշեցնենք, որ անցեալ տարեվերջին Արմէն Սարգսեան պաշտօնական նամակով դիմած էր հիմնադրամի հոգաբարձուներու խորհուրդի անդամներուն՝ նշելով, որ Կառավարութիւնը պէտք է յստակ, մանրամասն եւ թափանցիկ հաշուետուութիւն ներկայացնէ հիմնադրամի փոխանցած միջոցներով կատարուած ծախսերու վերաբերեալ:
