Home ՀԱՅԱՍՏԱՆ Արցախ Ծառայող Զինուորներու Ծնողները Վարչապետէն Խնդրած Են Ժամկէտէն Շուտ Զօրացրել Իրենց Որդիները

Արցախ Ծառայող Զինուորներու Ծնողները Վարչապետէն Խնդրած Են Ժամկէտէն Շուտ Զօրացրել Իրենց Որդիները

by MassisPost

44-օրեայ պատերազմին մասնակցած զինծառայողներու քանի մը տասնեակ ծնողներ այսօր՝ Յունուար 14-ին կառավարութեան առջեւ հաւաքուած էին՝ հանդիպում պահանջելով վարչապետին հետ։ Անոնք Նիկոլ Փաշինեանէն խնդրած են Արցախ ժամկէտային զինծառայութիւն կատարող իրենց որդիները զօրացրել օրէնքով սահմանուած ժամկէտէն շուտ:

Աւելի քան 2 ժամ տեւած բողոքի հաւաքը աւարտեցաւ, երբ ծնողներու խումբը ընդունեցին վարչապետի օգնականներ՝ Նայիրի Սարգսեանն ու Սուրէն Ղամբարեան։ Ըսին թէ՝ շաբաթ օր վարչապետը կ’ընդունի իրենց։

«Ուրեմն կապուած մեր խնդրանքի հետ` վարչապետի հետ հանդիպման, նշանակուեց օր` շաբաթ օրը` ժամը 12-ին, մեզ էլի կ’ընդունեն, արդէն վարչապետի ձեւակերպումով», – ըսաւ ծնողներէն մէկը:

Արցախ ժամկէտային զինծառայութիւն կատարողներու ծնողները կը պնդեն, որ պատերազմ անցուցած իրենց որդիները առողջական լուրջ խնդիրներ ունին եւ չեն կրնար շարունակել ծառայութիւնը։ Արթուր Բադալեանի որդին ռազմական գործողութիւններէն յետոյ կարճ ժամանակով արձակուրդի եկած է, բայց կան ժամկէտային զինծառայողներ, որոնք զօրակոչուելէն յետոյ տուն ընդհանրապէս չեն եկած. «Արձակուրդ եկել են, յետ են գնացել, խնդիրներ են եղել: Հիմա մենք կ’ուզենք մեր երեխեքի համար հարցեր լուծուեն: Եկել ենք էստեղ ծնողներով, որ հլը տեսնենք` վարչապետը մեզ ինչ պատասխան պիտի տա: Թող էտ 18-20 տարեկան երեխեքին ձրի չպահի, կռուեն, հենա փողով թող տանի, դիրքերը պահել տայ»:

«Իմ տղան արդէն տարի մի ամսուայ ծառայող է, ես իմ երեխուն չեմ տեսել` ոչ արձակուրդ է եկել, ոչ իր հասանելիք 6 ամիսը, որ լրանում է, 10 օրով ուղարկում են, ոչ դա, ոչ էլ հիմա խրախուսանքը, որովհետեւ եկած երեխեքը սաղ հիւանդ են: Էտ երեխեքին տանում են սահման, ի՞նչ անեն, մեռցնե՞ն», – ըսած է մէկ այլ ծնող:

Ծնողները ըսած են, թէ պատերազմէն յետոյ ձեռք բերուած առողջական խնդիրները պէտք է լուծուին, մինչդեռ մնալով դիրքերը` որդիները ալ աւելի կը հիւծուին. «Հոգեպէս անհաւասարակշիռ, վատառողջ 18-ամեայ պատանին կարո՞ղ է սահման պահել, երբ նա վախերի մէջ է, երբ առողջական խնդիրներ ունի: Ինչպէ՞ս էք պատկերացնում նրա պահած սահմանը: Ես տեսել եմ վերջին անգամ (որդուն), երբ գնացել եմ երդման արարողութեանը` մէկ տարի առաջ, հասանելիք արձակուրդը չստացան քարանթինի պատճառով, եւ յետոյ յաջորդեց պատերազմը, հիմա էլ խրախուսումը չի ստանում, որովհետեւ մնացած զինուորները, որոնք եկել են արձակուրդի, առողջական խնդիրներով այդ երեխաները չեն կարողանում վերադառնալ», – նշած են ծնողները:

Հայաստանի մէջ պարտադիր զինուորական ծառայութիւնը կը տեւէ 24 ամիս։ Իրենց որդիներուն համար, ըստ էութեան, արտօնութիւն պահանջող ծնողները կը պնդեն, թէ պատերազմ տեսած իրենց որդիներու փոխարէն զինուած ուժերուն մէջ անոնց տեղերը կրնան լրացնել պայմանագրայինները. «Իրենց տեղը ծառայելու համար մենք ունենք պայմանագրային ծառայողներ, թող գնան, պահեն դիրքերը: 18 տարեկան տղան պատերազմ է տեսել, էտ երեխան, որ եկաւ վաղը Հայաստան, ի՞նչ ձեւով է ապրելու, կարաք ասէք` նրա աչքերն ու յիշողութիւնը կորելո՞ւ են, էն էլ ինչ պատերազմ, բոլորը գիտեն»:

Պաշտպանութեան նախարարութիւնը չի պարզաբաներ, թէ արդեօք հնարաւոր է ժամկէտէն շուտ զօրացրել պատերազմի մասնակից զինծառայողները։

Հարակից Նյութեր

Leave a Comment