Լիբանանահայ Մարալ Նաճարեան ողջ է եւ կը գտնուի Ատրպէյճան, Մարալի քոյրը՝ Անի Նաճարեան տարեվերջին տեղեկացած է, որ Ատրպէյճանը վերջապէս պատասխանած է Մարդու իրաւունքներու եւրոպական դատարանի (ՄԻԵԴ) դիմումին:
«Ինքը Պաքուում է, ողջ է եւ իրեն սնունդ են տալիս», – ըսաւ Անի Նաճարեան:
«Ազատութիւնը» Դեկտեմբեր 1-ին անդրադարձած էր երկու լիբանանահայերու՝ Մարալ Նաճարեանի ու Վիգէն Էուլճեքեանի գերեվարման հանգամանքներուն։ Անոնք իրենց իրերը հաւաքելու համար Բերձոր մեկնած էին եռակողմ յայտարարութեան ստորագրման յաջորդ օրը՝ Նոյեմբեր 10-ին ու գերեվարուած։ Օրեր անց Վիգէն Էուլճեքեանին, որ թաքսիի վարորդ էր ու Շուշի հաստատուած, Ատրպէյճանը ներկայացուց որպէս վարձկան ահաբեկիչ, իսկ Մարալ Նաճարեանի վերաբերեալ որեւէ տեղեկութիւն չկար։ «Ազատութիւն»ի այդ տեսանիւթի նկարները օգտագործելով այժմ Ատրպէյճան Մարալին ալ կը ներկայացնէ, որպէս պատերազմի մասնակից:
«Պաքուի հեռուստատեսութիւնը ցոյց է տալիս, որ Վիգէնը եւ Մարալը իբր պատերազմի գնացած երկու անձ են՝ Լիբանանից եկած կռուելու, Արցախն ազատագրելու: Իրենք ասում են, որ մենք կարծում ենք, որ իրենք գերի են, բայց իրենք չեն ճշդում, որ իրենք գերի են», – նշեց Մարալի քոյրը:
Անին պատմած է, թէ քոյրը Պէյրութի պայթումէն յետոյ Հայաստան՝ խաղաղ կեանքի համար եկած էր եւ պատերազմէն օրեր առաջ երկուքով հաստատուած էին Բերձոր, Արցախի կառավարութիւնը անոնց համար տուն նախապատրաստած էր այդտեղ:
Այժմ՝ թէպէտ Պաքուն կը հաստատէ, որ Մարալ Նաճարեան իրենց մօտ է, սակայն բժշկական փաստաթղթեր դեռեւս չէ ներկայացուցած Սթրազպուրկի դատարանին, յայտնի չէ՝ թէ կինը ինչ վիճակի մէջ է։ Քոյրը ըսած է, որ երկու ամիս գերութեան մեջ գտնուող Մարալին հետ տեսակցելու Կարմիր խաչն ալ հնարաւորութիւն չէ ստացած:
«Մինչեւ այսօր Կարմիր խաչը չի կարողացել տեսնել Մարալին: Մենք այնտեղ դեռ երեք կին գերի ունենք, ինչո՞ւ են կանանց պահում այնտեղ, ո՞ւր է մեր կառավարութիւնը. վարչապետը լինի, ամբողջ անձնակազմը լինի, որ այս գործով զբաղւում են», – ըսաւ Անի Նաճարեան:
