Հայրենիքի պաշտպանի վերականգնողական կեդրոնը շուտով կ’ունենայ քայլուածքի եւ փրոսթեթիք գերժամանակակից գերմանա-հոլանտական տարրալուծարան, որ պիտի ծառայէ հայրենիքի համար իրենց կեանքը չխնայած խիզախ հայորդիներու առողջութեան վերականգման:
Ներկայիս կեդրոնէն ներս բուժում կը ստանան 120 զինուորներ:
Այս համատեղ նախաձեռնութիւնը կեանքի կոչուած է «Հայաստան» Հիմնադրամի «Մենք ենք, մեր սահմանները» դրամահաւաք արշաւի շրջագիծէն ներս Հոլանտայի հայ համայնքի եւ «Հայաստան» համահայկական հիմնադրամի գործընկեր «Vereniging Armeni fonds Nederland»-ի ֆինանսաւորմամբ:
«Սա առաջին նմանատիպ տարրալուծարան է Հայաստանի մէջ: Այն մեզ թոյլ կու տայ ապահովել գերժամանակակից փրոսթեթիք մարմինի մասեր, որ ոչ միայն առաւելագոյնի կը հասցնէ իւրաքանչիւր հիւանդի գործելու հնարաւորութիւն այլ եւ առիթ կ’ընծայէ խուսափելու հետագայ բարդացումներէն եւ վիրահատութիւններէ: Մենք շնորհակալ ենք բոլոր այն հայերուն, որոնք «Հայաստանե համահայկական հիմնադրամի միջոցով աջակցեցան այս կենսական ծրագրի իրականացման»,– ըսած է Հայրենիքի պաշտպանի վերականգնողական կեդրոնի տնօրէն Հայկուհի Մինասեանը:
Մեր վիրաւոր երիտասարդներու բուժումն ու խնամքը գերակայ նշանակութիւն ունեն Հիմնադրամի, ինչպէս նաեւ հայ ազգի համար: Սա առաջին ծրագիրն է գալիք բազմաթիւ նախաձեռնութիւններու շարքին, որոնք մշակուած են հայրենիքի պաշտպանութեան համար վիրաւորուած մեր զինուորներու անձնուէր գործը գնահատելու եւ իրենց ֆիզիքական կարիքները հոգալու համար: Ներկայիս կը մշակուին նաեւ շարք մը ծրագիրներ ինչպէս հայրենիքի պաշտպաններուն, այնպէս ալ իրենց ընտանիքներուն աջակցելու համար:
Աշխարհի տարբեր անկիւններուն ապրող հայերուս պարտքն է մեր երախտագիտութիւնը յայտնել մեր քաջորդիներուն իրենց անձնազոհ ծառայութեան համար: Հիմնադրամը պիտի շարունակէ աջակցիլ անոնց, որպէսզի պատերազմի հետեւանքները չյանգեցնեն իրենց կեանքի որակի անկման:
«Հայաստան» Հիմնադրամ