Ատրպէյճանի խորհրդարանը կոչ կ’ընէ երկրի կառավարութեան, դիմելու ԵԱՀԿ ղեկավարութեան, Ֆրանսան Մինսքի խումբի համանախագահներու կազմէն ետ կանչելու կոչով։ Այդ մասին ըսուած է Ատրպէյճանի Միլի մեճլիսի այսօր՝ Նոյեմբեր 26-ին ընդունած յայտարարութեան մէջ։
«Միլի մեճլիսը կոչ կ’ընէ Ատրպէյճանի կառավարութեան, դիմելու ԵԱՀԿ ղեկավարութեան Ֆրանսան ետ կանչելու պահանջով։ Ֆրանսան վերջին օրերու իր դիրքորոշումներով եւ յայտարարութիւններով կասկածի տակ կը դնէ իր չէզոքութիւնը», – նշուած է ատրպէյճանական խորհրդարանի յայտարարութեան մէջ։
Ֆրանսայի Ծերակոյտը երէկ՝ Նոյեմբեր 25-ին ընդունեց «Լեռնային Ղարաբաղի Հանրապետութիւնը ճանաչելու անհրաժեշտութեան մասին» բանաձեւ, որ կոչ կ’ընէ երկրի կառավարութեան ճանաչելու Արցախի անկախութիւնը։
Հայաստանը եւ Արցախը ողջունած են Ֆրանսայի Ծերակոյտի բանաձեւը, Ատրպէյճանը քննադատած է զայն։