Ուրուկուէյի ամենամեծ նահանգներէն Փայսանտուի օրէնսդիր մարմինը միաձայն` 28 կողմ քուէներով ճանչցաւ Արցախի անկախութիւնը:
Օրէնսդիր մարմնի նախագահ, Համայնավար կուսակցութեան ներկայացուցիչ Էրմես Փասթորինին իր ելոյթին մէջ նշած է 1915 թուականի Հայոց ցեղասպանութեան դաժանութիւնը եւ նկատի ունենալով Արցախի մէջ տիրող մարդասիրական ծանր իրավիճակը՝ առաջարկած է ճանչնալ Արցախի անկախութիւնը, որ ընդունուած է միաձայն:
Սա Արցախի անկախութեան առնչութեամբ Ուրուկուէյի մէջ առաջին պաշտօնական որոշումն է ուղիղ ժողովրդավարական քուէով ձեւաւորուած մարմնի կողմէ:
Փայսանտուի մէջ շատ քիչ հայեր կը բնակին: Նիստին ներկայ երկու հայեր՝ Սանտրա Նաւադեանը եւ Ասատուր Չեքմէեանը, քուէարկութենէն ետք օրէնսդիր մարմնի նախագահին նուիրած են Արցախի դրօշը, եւ որոշուած է այն դնել գլխաւոր սեղանին:
Նիստը տեղի ունեցած է Փայսանտուի մշակոյթի տան մէջ՝ նկատի ունենալով, որ օրէնսդիր մարմնի Պալատին մէջ շինարարական աշխատանքներ կ’ընթանան:
Վստահելի աղբիւրներէ «Ազատութեան» յայտնի դարձած է, որ Հայաստանի եւ Ուրուկուէյի իշխանութիւնները անմիջական եւ աշխոյժ կապի մէջ են՝ քննարկելով Արցախի մէջ հայ ժողովուրդի դէմ իրականացուող յարձակումները եւ հնարաւոր բոլոր լուծումները:
Արցախի անկախութեան ճանաչման հարցով Ուրուկուէյի հայ համայնքի ներկայացուցիչները հանդիպումներ ունեցած են երկրի արտաքին յարաբերութիւններու նախարար Ֆրանսիսքօ Պուսթիժոյի եւ խորհրդարանի արտաքին յարաբերութիւններու յանձնաժողովի անդամներուն հետ:
Ուրուկուէյի կառավարութիւնը շաբաթներ առաջ յատուկ յայտարարութեամբ դատապարտած էր յարձակումները հայ ժողովուրդի դէմ:
