Հայաստանի պաշտպանութեան նախարարութիւնը կը հերքէ, թէ Ատրպէյճանի մէջ գերեվարուած հայ սպան ներթափանցող (տիվերսանթ) է, ինչպէս կը պնդէ ատրպէյճանական կողմը։ Նշենք, որ Հայաստանի պաշտպանութեան նախարարութեան խօսնակը երէկ տեղեկացուց, որ Օգոստոս 22-ին` ժամը 19:30-ի սահմաններուն, մարտական յենակէտը ստուգելու նպատակով սպայ՝ Գուրգէն Ալավերտեան եղանակային խիստ անբարենպաստ պայմաններու պատճառով շփոթած եւ մոլորած է: Կը կատարուին որոնողական աշխատանքներ:
Թէ շփման ճիշդ որ հատուածին մէջ դէպքը տեղի ունեցած է, Հայաստանի պաշտպանական գերատեսչութիւնը չի մանրամասներ։ Մինչդեռ Ատրպէյճանի պաշտպանութեան նախարարութիւնը երէկ տարածած յայտարարութեան մէջ կը տեղեկացնէ, որ Օգոստոս 23-ին, առաւօտեան 05.45-ի սահմաններուն, հայկական կողմը ներթափանցման փորձ կատարած է, սակայն կորուստներ կրելով նահանջած է։
Մարտի ընթացքին, ըստ Ատրպէյճանի պաշտպանութեան նախարարութեան՝ գերեվարուած է հայկական ներթափանցման հետախուզական խումբի ղեկավարը։ Ուշագրաւ է, որ Ատրպէյճանի ռազմական գերատեսչութիւնը գերի ընկած Գուրգէն Ալավերտեանին կը ներկայացնէ, որպէս աւագ-լեյտենանտ գնդապետ Գուրգին Ալբերեան։ Ի դէպ, ատրպէյճանական քանի մը կայքեր տեսանիւթ տարածած են, ուր լուսանկարին մէջ երեւցող զինուորական համազգեստով տղամարդը կը ներկայացուի, որպէս հայկական ներթափանցման հետախուզական խումբի ղեկավար։ Տեսանիւթին մէջ զինուորականին դէմքը ծածկուած է գլխարկով, իսկ տեսանիւթին աւարտին արդէն հրապարակուած է լուսանկարը։
Հայաստանի պաշտպանութեան նախարարութեան խօսնակ՝ Շուշան Ստեփանեան մինչդեռ կը պնդէ, որ Ատրպէյճանի պաշտպանութեան նախարարութեան` ներթափանցման մասին տարածած հաղորդագրութիւնը ապատեղեկատուութիւն է. – «Ատրպէյճանի պաշտպանութեան նախարարութեան տարածած հաղորդագրութիւնն ապատեղեկատուութիւն է, որեւէ ներթափանցման փորձ տեղի չի ունեցել, պարզապէս փորձ է արուում մոլորուածին ներկայացնել որպէս ներթափանցող»:
Առ այս պահը յայտնի չէ` ուր եւ ինչ վիճակի մէջ է Օգոստոս 22-էն մոլորուած համարուող հայ սպան։ Ո՛չ Հայաստանի պաշտպանութեան նախարարութիւնը եւ ո՛չ ալ Կարմիր խաչի հայաստանեան ներկայացուցչութիւնը դեռեւս որեւէ տեղեկութիւն չեն յայտներ:
Նշենք, որ Հայաստանի զինուած ուժերու պատրաստութեան ծրագիրին համաձայն` այսօր վաղ առաւօտեան` ժամը 05:00-ին, Զինուած ուժերու գլխաւոր շտաբի պետի ղեկավարութեամբ՝ մեկնարկած են Հայաստանի հարաւ-արեւելեան ուղղութեամբ տեղակայուած զօրամիաւորման եւ զօրամասերու հետ կատարուող հրամանատարաշտաբային զօրավարժութիւններ։ Հայաստանի պաշտպանութեան նախարարութիւնը կը տեղեկացնէ, որ զօրավարժութիւններուն նպատակը ստուգելն է զօրքերու մարտական պատրաստականութիւնը, ինչպէս նաեւ խաղարկել հակառակորդի հաւանական յարձակողական ետմղման եւ անոր հարուածային խմբաւորումներու ջախջախման օփերատիւ-մարտավարական դրուագներ։
