Երրորդ նախագահ՝ Սերժ Սարգսեան սկսած է «անկեղծ զրոյցը», որու մասին յայտարարած էր ամիսներ կամ աւելի քան տարի մը առաջ, նշելով, թէ դեռ չէ եկած ժամանակը, եւ երբ գայ, կը սկսի խօսիլ: Զրոյցը սկսած է ապրիլեան պատերազմէն, սակայն փորձագէտներու կարծիքով, ոչ մէկ նոր բան անոր մասին յայտնելով։
Արցախի «Միացեալ Հայաստան» կուսակցութեան նախագահ՝ Վահան Պատասեանի կարծիքով՝ Սերժ Սարգսեանի յայտարարութիւնները իրար կը հակասեն: «Նա յայտարարում էր, որ յարձակումը եղել է անսպասելի, գոնէ մենք գիտենք, որ առաջնագծի բարձրաստիճան հրամանատարները չգիտէին, անակնկալ էր կամ իմացել են մէկ-երկու ժամ առաջ։ Նրանց գրեթէ բոլորի արհեստավարժութիւնը պակասում էր, հակառակ դրա՝ կրտսերների արհեստավավրժութիւնը առկայ էր։ Բայց ի՞նչն էր սխալը՝ քատրային սխալ քաղաքականութիւնը։ Նկատի ունեմ՝ անձամբ պաշտպանութեան նախարար Սեյրան Օհանեանի եւ Սերժ Սարգսեանի կողմից. տէ ֆաքթօ նրանք էին նշանակումներ անում, առաջնորդուում էին զուտ նրանց ենթարկուելիութեան չափով ու մէկ էլ հաշուի էին առնում նախընտրական ու յետընտրական գործընթացներում նրանց մասնակցութեան ունակութիւնները»,- «Առաջին լրատուական»-ի հետ զրոյցին ըսաւ Պատասեան։
Վահան Պատասեան կը յորդորէ ապրիլեան պատերազմի հանգամանքները ուսումնասիրող յանձնաժողովին ուշադրութիւն դարձնել վերը նշուած հարցերուն. «Միանշանակ հրամանատարների մեղքն է եղել, որ այդ դիրքերը ազերիները գրաւել են։ Կրկնակի մեղաւոր էր նաեւ Պաշտպանութեան բանակի հրամանատարութիւնը՝ Լեւոն Մնացականեանի գլխաւորութեամբ։ Խաչատուրովը, Սերժ Սարգսեանը համահաւասար մեղաւոր են յաջորդ օրերին այդ դիրքերն անմիջապէս յետ չվերցնելու համար։ Յետ վերցնելու համար կային համապատասխան ստորաբաժանումներ, յատուկ պատրաստուած զինուորականներ, որոնք պատրաստ էին դիրքերը յետ վերցնել։ Բայց նրանք դա չէին ուզում, որովհետեւ դա դարձրել էին մենաշնորհ եւ ուզում էին, որ անպայման իրենց ուզած մարդիկ ու ստորաբաժանումները դա անեն՝ յատուկ դափնիի համար։ Նրանք էլ ապաշնորհ գտնուեցին։ Գաղտնիք ասեմ՝ հիմնական զոհերը տուել ենք հենց այդ ապաշնորհութեան պատճառով։ Ես տեսնում եմ, որ յանձնաժողովը շատ հեռու է դրանից, մօտ էլ չի գալիս ճշմարտութեանը, իսկ Սերժ Սարգսեանը խօսելու ոչինչ չունի, օգտուում է նրանից, որ յանձնաժողովը սխալ ուղու վրայ է, ու անցնում է յարձակման, որպէսզի լաւագոյն ձեւով պաշտպանուի»։
Պատասեան շարունակած է.- «Բայց մեզ ի՞նչ է հետաքրքրում՝ հակառակորդն ինչքան զոհ ունի, մենք դիրքեր ենք կորցրել, հարցն այստեղ հեկտարի չափի մասին չէ, հարցը ռազմավարական բարձունքի մասին չէ, հարցն այստեղ հոգեբանօրէն այն մասին է, որ մենք տարածքներ ենք կորցրել։ 30 տարուայ մէջ ազերիներն ունեցել են այն կարծրատիպը, որ իրենք դիրք վերցնող չեն, հայերը դիրք կորցնող չեն։ Բայց այդ կարծրատիպը կոտրուեց՝ յօգուտ ազերիների։ Սա մեծ հոգեբանական գործօն էր, որ 2016 թուականի ապրիլից մինչեւ աշուն Արցախի սահմանամերձ շրջաններից մարդիկ փորձէին լքել տարածքը՝ Թալիշը, դրա յարակից գիւղերը։ Չկար այն հոգեբանական ու յաղթական գործօնը, որ մենք տարածք պահող ենք։ Բնակիչը տեսաւ, որ օդային տարածքն անպաշտպան է, ապաշնորհներին նշանակում են բարձրաստիճան պաշտօնների, ու այդ տեսակէտից իրենց անվտանգութիւնը վտանգուած է։ Ահա այս ուղղութեամբ պէտք է առարկայական աշխատեր յանձնաժողովը, ես յանձնաժողովի աշխատանքը համարում եմ անբաւարար»։
Ան ընդգծեց թէ.- Կամաց-կամաց ամէն ինչ տանում են բարոյական, դիւանագիտական յաղթանակի, բայց ո՞րն էր յաղթանակը։ Դիւանագիտական եւ ռազմական յաղթանակը շօշափելի է լինում, ինչպէս Տաւուշում տեսանք»։
Վահան Պատասեանի խօսքով՝ Սերժ Սարգսեան այժմ կ’արդարանայ, թէ նոյն կերպով ինքզինք կը պահէր Ռոպերթ Քոչարեան, որովհետեւ քրէական գործը սխալ ուղղութեամբ կը տանին. «Որովհետեւ Հայաստանի քաղաքական իշխանութիւնը քաղաքական գնահատական չի տուել։ Բոլոր մեղաւորներին պէտք է տեսնել մեղադրեալի աթոռին պատշաճ ձեւով, իսկ դրա համար պէտք է յանձնարարական տրուի։ Բոլորն իրենց ուզածով են գործում, որովհետեւ բոլորն էլ հին համակարգի մարդիկ են։ Նիկոլ Փաշինեանը քատրային ջարդ արեց հետեւեալ իմաստով՝ հին համակարգի բոլոր մասնակիցներին պահպանեց, իսկ ազնիւ, մաքուր, ազգային գաղափարներով մարդկանց մօտ քատրային ջարդ է անում։ Նա փաստօրէն յեղափոխութեան մասնակիցների քատրային ջարդ է անում»։
