Վարչապետ Նիկոլ Փաշինեանի մօտ տեղի ունեցած է խորհրդակցութիւն, որու ընթացքին քննարկուած են հանրակրթութեան պետական չափորոշիչի եւ առարկայական չափորոշիչներու նախագիծերով առաջարկուող հիմնական փոփոխութիւնները:
Կրթութեան, գիտութեան, մշակոյթի եւ սփորթի նախարար՝ Արայիկ Յարութիւնեան նշած է, որ առաջարկուող արմատական փոփոխութիւնները կ’ուղղուին, թէ ապագային ինչ քաղաքացի կը ցանկանք ունենալ: Նախարարի խօսքով՝ փոփոխութիւնները միտուած են հանրակրթութեան ոլորտին մէջ կարողութիւններու զարգացման, իսկ նոր չափորոշիչներով դպրոցներուն մէջ մեծ ուշադրութիւն պիտի տրուի բովանդակութեան:
Զեկուցուած է, որ նախագիծերով նախատեսուած է կատարել աւագ դպրոցի արմատական բարեփոխութիւն, ներդնել տիպային ուսուցում, քրետիդային (շնորհաբաշխութեամբ) համակարգ, գիւղական համայնքները ապահովել կրթութեան նոյն հնարաւորութիւնները, կիրառել ցանցային դպրոցի օրինակը եւ պետական դպրոցներու ֆինանսաւորումը կատարել առաւելագոյն ժամաքանակով: Նախատեսուած է նաեւ կազմակերպել հետազօտական աշխատանքներ, ուսուցողական այցեր եւ ընդլայնել ուսուցիչներու գործիքակազմը: Պիտի ներդրուի նախագծային պարտադիր ուսուցում 7-րդ դասարանէն, իսկ մինչեւ 5-րդ դասարանի 2-րդ կիսամեակը միաւորային գնահատում տեղի պիտի չունենայ, անբաւարար գնահատման շեմը չեղեալ պիտի համարուի:
Փոփոխութիւններու ծիրէն ներս գնահատուած են նաեւ այն 8 կարողութիւնները, որոնք կրնան նկարագրել քաղաքացիի տեսլականը դպրոցի աւարտին: Խորհրդակցութեան ընթացքին ներկայացուած են հիմնական առարկայական փոփոխութիւնները, որոնցմով պարտադիր առարկաներ սահմանուած են «Հայոց լեզու եւ գրականութիւն», «Հայոց պատմութիւն», «Մաթեմատիկա» եւ «Օտար լեզու» առարկաները:
Մշակուած է վերը նշուած փոփոխութիւնները կատարելու ճանապարհային քարտէզը: Նշուած է, որ փոփոխութիւնները քննարկուած են նաեւ հանրապետութեան 1500-էն աւելի ուսուցիչներու հետ, որոնք իրենց հերթին եւս հանդէս եկած են առաջարկութիւններով:
Զեկուցուած է նաեւ, որ դասագիրքերու փոփոխութիւնները կատարելու ուղղութեամբ քննարկումները սկիզբ կ’առնեն 2021 թուականին եւ 2022-ին կը ներդրուի ամբողջական համակարգը:
Վարչապետը կարեւորած է հանրակրթութեան որակի բարձրացման ուղղութեամբ հետեւողական բարեփոխումները եւ ընդգծած դպրոցներուն մէջ դասաւանդուող օտար լեզուներու ընդլայնման, աշակերտներու կարողութիւններու զարգացման միտուած քայլերը կատարելու անհրաժեշտութիւնը: Նիկոլ Փաշինեան յանձնարարած է նախագիծերը լրամշակել հանրային քննարկման արդիւնքին ներկայացուած առաջարկութիւններու հիման վրայ: «Հանրակրթութեան որակի բարձրացումն այն ամբողջութիւնն է, ինչը համապատասխանում է մեր տնտեսական, քաղաքական եւ ռազմավարական պատկերացումներին»,- նշած է վարչապետը՝ կարեւորելով նաեւ հանրակրթութեան ոլորտին մէջ փոփոխութիւններու կատարումը մինչ այժմ կառավարութեան կողմէ ընդունուած ռազմավարութիւններուն համահունչ: Գործադիրի ղեկավարը յանձնարարած է նաեւ նախագիծերուն հետ կապուած տանիլ հանրային իրազեկման լայն աշխատանք: