Միքայէլ Մինասեան պէտք է զբաղի իրեն վերագրուող քրէական գործերով, այլ ոչ թէ զբաղի 89 պատգամաւորներու իրենց աշխատանքը կատարելու հետ կապուած իր ենթադրութիւններով: Այս մասին, Յուլիս 9-ին, Ազգային ժողովի մէջ լրագրողներու հետ զրոյցին, նշեց ԱԺ-ի փոխ խօսնակ՝ Ալէն Սիմոնեան, անդրադառնալով Վատիկանի մօտ ՀՀ նախկին դեսպան՝ Միքայէլ Մինասեանի յայտարարութեան, թէ յաջորդ իշխանութիւններու օրօք ԱԺ-ի 89 պատգամաւորները եւ Նիկոլ Փաշինեանը պիտի դատուին սահմանադրական յեղաշրջում կատարելու համար:
«Էդ յաջորդ իշխանութիւններին դեռ շատ ժամանակ կայ: Ես կարծում եմ, որ այն հեքիաթները, երեւակայութիւնները, երազախաբութիւնը, որոնք պարոն Մինասեանը վերապրում է եւ դրանք յաճախ եթեր են բաց թողնում, իմ կողմից եւ շատ-շատերի կողմից մեկնաբանութեան կարիք այսքան յաճախ չունեն: Ես հասկանում եմ, որ պարոն Մինասեանը մամուլի դաշտում դեռ ինչ-որ ազդեցութիւն ունի, բայց ժամանակին, երբ ամբողջ մամլոյ դաշտը, ամբողջ համակարգը պատկանում էր նոյն Միքայէլ Մինասեանին եւ իր աներոջը՝ Սերժ Սարգսեանին, իրենց չօգնեց: Հիմա առաւել եւս անհետաքրքիր է տարբեր ցնդաբանութիւնների հետ կապուած լուրջ մեկնաբանութիւններով հանդէս գալ: Այնուամենայնիւ, նա գտնուում է հետախուզման մէջ եւ որպէս ատելի կերպար, ես իր տեղը լինէի, կու գայի Հայաստանի իրաւապահներին կը ներկայանայի: Բայց ինքը, կարծում եմ՝ նման բան չի անի»,-յայտարարեց Ալէն Սիմոնեան:
«Չի կարող նա ամբողջ կեանքում հետախուզման մէջ գտնուել: Դա վերաբերում է ոչ միայն իրեն, այլեւ մնացած բոլորին, որոնք ենթադրում եմ, այլ երկրների անձնագիր ունենալով երրորդ երկրում թաքնուելով խուսափելու են: Իրենք չեն խուսափելու ժամանակի հարց է»,-ընդգծեց ԱԺ-ի փոխ խօսնակը:
Ինչ կը վերաբերի, որ շատեր կրցած են լքել Հայաստանի տարածքը եւ խուսափիլ պատասխանատուութենէն, Ալէն Սիմոնեան յիշեցուց, որ Հայաստանը դատական համակարգի լուրջ խնդիր ունի. «Մենք այդ մասին բազմաթիւ անգամ խօսել ենք, իսկ ԱԺ-ում գտնուող մեր ընդդիմադիր գործիչներն ասել են՝ դատական համակարգում խնդիր չկայ եւ բոլոր հնարաւոր ձեւերով մեզ փորձել են խանգարել դատական համակարգում փոփոխութիւններ անել: Ամենաազնիւ դէմքի արտայայտութեամբ, մարդկանց խաբելով քաղաքական խաղեր են խաղացել, հիմա էլ են խաղում՝ համոզելով, որ դատական համակարգում խնդիր չկայ: Հիմա դուք իրենց հարցրէք, եթէ դատական համակարգում խնդիր չկայ, ճգնաժամ չկայ, բա էդ մարդիկ որոնք Հայաստանի հետ ինչ ասես արել են, բա էդ ո՞նց դատարանների որոշումներով հնարաւորութիւն ստացան փախչել Հայաստանից»:
