Թուրքիոյ Հաթայ նահանգին մէջ գտնուող միակ հայաբնակ գիւղին՝ թաղամասի կարգավիճակ ունեցող Վաքըֆլըին մէջ, Մուսա լերան թանգարան բացուած է ։
Վաքըֆլը գիւղի Հայ Առաքելական եկեղեցւոյ հիմնադրամի նախագահ՝ Ճեմ Չափարը «Տողան» լրատուական գործակալութեան պատմած է, որ կնոջ՝ լրագրող Լորա Չափարի հետ միասին երկար ժամանակ աշխատած են թանգարանի ստեղծման ուղղութեամբ, եւ երախտագիտութիւն յայտնած է Հաթայի նահանգապետ Ռահմի Տողանին, նախագիծին աջակցելուն համար։
Չափարը նշած է, որ թանգարանին մէջ ներկայացուած է ոչ միայն հայկական մշակոյթի, այլ նաեւ Անատոլիայի բոլոր ժողովուրդներու մշակութային ներկապնակը։
Թանգարանի ձեւաւորման համար օգտագործուած են գիւղի բնակիչներուն տրամադրած իրերը․ ցուցադրուած են աւանդական տարազներ, պատմական իրեր, զարդեր, պաստառներուն վրայ կարելի է տեսնել մուսալեռցիներու աւանդոյթներուն մասին պատմող հոլովակներ։
«Աշխատանքները արդէն աւարտած էինք, սակայն համաճարակի պատճառով թանգարանի բացումը չկարողացանք կատարել։ Իրավիճակի կարգաւորման հետ մէկտեղ, թանգարանը ալ արդէն բաց է այցելուներու համար։ Առաջիկային պաշտօնական բացում ալ կ’ընենք», – ըսած է Ճեմ Չափարը։
Շուրջ 130 հայ բնակիչ ունեցող Վաքըֆլըն կը գտնուի Հաթայ նահանգի Սամանդաղ շրջանի, Մուսա լերան լանջերուն վրայ։
