Վերջին մի քանի օրերու ընթացքին Ամերիկան դարձեալ ականատես եղաւ ոստիկանութեան դաժանութիւններուն եւ ռասիզմի օրինակներու, որոնց պատճառաւ այս երկիրը կը տառապի դարեր շարունակ:
Ոստիկանական բռնութեան այս դատապարտելի գործողութիւնները յառաջացուցին բողոքներու մեծ ալիք ամբողջ երկրի տարածքին՝ ի պատասխան Ճորճ Ֆլոյտի սարսափելի մահուան՝ ոստիկանութեան չորս անդամներուն ձեռքով: Մենք կը հաւատանք, որ այս բողոքի գործողութիւնները պէտք է մնան խաղաղ եւ ոչ բռնի, որպէսզի պահպանեն «սեւ կեանքեր» շարժման իսկական նպատակները:
Որպէս ամերիկահայեր, մենք չենք կրնար լուռ մնալ, երբ մեր աֆրոամերիկեան համայնքի ընկերները շարունակաբար կ՛ենթարկուին, ոտնձգումներու, հետապնդումներու եւ ռասիստական ճնշումներու, որոնք տարածուած են ամերիկեան իրաւապահ համակարգէն ներս:
«Կայծ» երիտասարդական Միութիւնը կը պահանջէ, որ Մինըսոթա նահանգի համապատասխան մարմինները եւ պետական պաշտօնեաները մանրակրկիտ հետաքննեն Մինեափոլիսի չորս ոստիկաններու ձեռքի տակ Ճորճ Ֆլոյտի անարդար եւ ողբերգական մահը:
Մենք կ՛ողջունենք ոստիկան Տերիք Շոուինի արագ ձերբակալութիւնը եւ կոչ կ՛ընենք անյապաղ հետաքննութիւն եւ դատաքննութիւն նախաձեռնել այդ օրը ներկայ միւս երեք ոստիկաններու նկատմամբ:
Մենք կոչ կ՛ընենք երկրի բոլոր իրաւապահ մարմիններուն եւ պետական պաշտօնեաներուն իրականացնելու ուժեղ քաղաքականութիւն եւ բարեփոխումներ՝ կանխելու համար հետագայ ցանկացած վայրագութիւններ եւ ցանկացած յանցագործութիւն ոստիկաններու կողմէ մեր համաքաղաքացիներու նկատմամբ:
Մեր մտքերն ու համակրանքը զոհուածներու ընտանիքներուն հետ են, եւ մենք կը յայտնենք մեր համերաշխութիւնը այս երկրի միւս հատուածներուն ու կը սգանք այս նեղ օրերը մեր ամերիկացի համաքաղաքացիներուն հետ:
«Կայծ» Երիտասարդական Միութեան Վարչութիւն
