Մայր Աթոռի տեղեկատուական համակարգը անդրադարձած է վարչապետ Նիկոլ Փաշինեանի երէկուայ ըրած յայտարարութիւններուն, հոգեւորականութեան վերաբերող:
«Վարչապետը ի շարս այլ հարցերի անդրադարձ կատարեց նաեւ հոգեւորականութեանը՝ յընթացս որակումներ ու գնահատականներ հնչեցնելով նրանց գործունէութեան վերաբերեալ։
Այս օրերին, երբ մեր ժողովուրդը պատրաստուում է աղօթքով իր խոնարհումը բերելու Հայոց Ցեղասպանութեան սուրբ նահատակների յիշատակի առջեւ, Մայր Աթոռ Սուրբ Էջմիածինը, չհամաձայնելով հանդերձ տրուած գնահատականներին ու արտայայտուած տեսակէտներին, այս պահին ձեռնպահ է մնում անդրադառնալ վերջիններիս»,- նշուած է յայտարարութեան մէջ։
Ըստ այդ յայտարարութեան, Ցեղասպանութեան նահատակներու յիշատակի օրուայ նախաշեմին՝ Գարեգին Երկրորդ Ամենայն Հայոց կաթողիկոսի հայրական յորդորն է, «զերծ մնալ հակառակութիւններից ու շահարկումներից եւ սիրոյ, համերաշխութեան ու միաբանութեան ոգով հայցել բարեխօսութիւնը մեր սուրբ նահատակների՝ ի նպաստ հայրենիքի զօրացման, համազգային կեանքում առկայ մարտահրաւէրների յաղթահարման եւ մեր ժողովրդի բարօրութեան»։
Վարչապետը, մասնաւորապէս, ըսած էր.- «Հայաստանում ակնյայտ է դառնում, որ հոգեւոր կեանքն արժէքների եւ գաղափարների սերմանման մեծ բացեր ու հարցեր ունի, որն էլ առաջացնում է հոգեւորականութեան շրջանում լրջագոյն հիասթափութիւն»:
