Աշխարհի 180 պետութիւններու շարքին, մամուլի ազատութեան մակարդակով Հայաստանը 61-րդ տեղն է՝ Վրաստանի, Լեհաստանի եւ Խրուաթիոյ հետ գրեթէ նոյն մակարդակի վրայ:
Այդ կը վկայեն աշխարհի ամենահեղինակաւոր լրագրողական կառոյցներէն մեկուն՝ «Լրագրողներ առանց սահմաններու» կազմակերպութեան հրապարակած տարեկան զեկոյցի տուեալները:
«Մամուլի ազատութիւնը աշխարհին մէջ 2020 թուականին» վերնագրուած այս փաստաթուղթը, ընդհանուր առմամբ դրական գնահատած է Հայաստանի լրատուական տիրող մթնոլորտը, զեկոյցի հեղինակները զայն բնութագրած են «Բազմազան, բայց դեռեւս ոչ անկախ»:
«Լրատուական բազմազանութիւնը երկրին մէջ կը ծաղկի, սակայն Հայաստան 2018 թուականին տեղի ունեցած «Թաւշեայ յեղափոխութենէն» յետոյ ձեւաւորուած կառավարութիւնը չէ կարողացած յաղթահարել լրատուական դաշտի առկայ բեւեռացումը», – նշած են զեկոյցի հեղինակները, աւելցնելով, – «Երկրին մէջ գործող հիմնական հեռուստաալիքներու խմբագրական քաղաքականութիւնը կը համընկնի անոնց սեփականատէրերու շահերուն: Դեռ շատ ընելիք կայ լրագրողական անկախութեան եւ լրատուամիջոցներու պատկանելիութեան շուրջ, թափանցիկութեան հասնելու համար»:
Զեկոյցի հեղինակները նաեւ կեղծ լուրերու տարածման դէմ պայքարին մասին արձանագրած են. «Մտահոգութիւններ առկայ են լրագրողներու դէմ դատական գործընթացներու, ինչպէս նաեւ կեղծ լուրերու դէմ պայքարի որոշակի անհամաչափութեան հետ կապուած: Անվտանգութեան ուժերու ներգրաւումը ապատեղեկատուութեան դէմ պայքարին, ընկերային ցանցերու որոշ օգտատէրերու, անոր յաջորդող ձերբակալութիւնները, ինչպէս նաեւ առանց քաղաքացիական հասարակութեան եւ լրագրողներու հետ նախապէս քննարկման [այս ոլորտին] վերաբերող օրէնքները ընդունելու փորձերը եւս մտահոգիչ են»:
«Յետաքննական լրագրութիւնը [հայաստանեան] համացանցէն ներս կը ծաղկի, լուրջ տեղ զբաղեցնելով քորուփցիայի դէմ պայքարի համապետական արշաւին մէջ», – նշած են զեկոյցի հեղինակները:
Աւելցնենք, որ «Լրագրողներ առանց սահմաններու» կազմակերպութեան այս զեկոյցին մէջ Հայաստանը արդէն երկրորդ տարին է, որ 61-րդ տեղը կը գրաւէ: 2018-ին՝ Հայաստանը 80-րդն էր:
Ինչ կը վերաբերի Ատրպէյճանին, ապա այս երկիրը մամուլի ազատութեան մակարդակով կը շարունակէ ոչ միայն տարածաշրջանին, այլեւ աշխարհի ետնապահներէն մէկը մնալ: «Լրագրողներ առանց սահմաններու» կազմակերպութեան գնահատումով, լրատուամիջոցներու ազատութեան մակարդակով Ատրպէյճանը կը գրաւէ 168-րդ տեղը: Նախորդ տարուայ համեմատ Ատրպէյճանը նահանջած է եւս երկու հորիզոնականով:
Զեկոյցի հեղինակները նշած են ընդգծելով, որ Ատրպէյճանական իշխանութիւնները չեն զլանար լրագրողներու դէմ ճնշումները տեղափոխելու երկրի սահմաններէն դուրս:
«Երբեմն կը յաջողին հասնիլ Ատրպէյճանցի լրագրողներու ձերբակալութեան, ինչպէս օրինակ՝ Ուքրանիա կամ Վրաստան: Երբեմն ալ արտասահմանեան երկիր բնակող Ատրպէյճանցի լրագրողներու դէմ դատական հայցեր կը ներկայացուին, ինչպէս ըսենք Ֆրանսա», – նշուած է «Լրագրողներ առանց սահմաններու» կազմակերպութեան զեկոյցին մէջ:
