Հայոց Ցեղասպանութեան 105-րդ տարելիցին ընդառաջ, Հայոց Ցեղասպանութեան թանգարան-հիմնարկը կոչով մը դիմած է Հայաստանի քաղաքացիներուն, հայ ժողովուրդին ու անոր բարեկամներուն, յորդորելով 24 Ապրիլին Ֆէյսպուքի իրենց լուսանկարները փոխարինել յատուկ այդ նպատակով ստեղծուած, շրջանակի մէջ առնուած իրենց հարազատներուն` նահատակ կամ վերապրող, լուսանկարներով, իսկ նման նկարներու չգոյութեան պարագային` անուն-մականունով, նաեւ անոր մասին փոքր պատմութեամբ մը:
Այս առիթով հրապարակուած հաղորդագրութեան մէջ կը նշուի հետեւեալը. «Եթէ չկան զոհ կամ վերապրող հարազատներ, ապա տեղադրեցէք Ցեղասպանութեան զոհ արեւմտահայ
մտաւորականներու, հասարակական-քաղաքական գործիչներու, ֆիտայիներու, շարքային զինուորներու եւ զօրավարներու լուսանկարները: Դրէք արեւմտահայութեան մշակութային ժառանգութեան գանձերու լուսանկարները, կիսուեցէք Արեւմտեան Հայաստանի ձեզի հասանելի պատկերներով: Եւ ընդամէնը մէկ պարզ գրութեամբ` ԵՍ ՅԻՇՈՒՄ ԵՄ կամ ԿԸ ՅԻՇԵՄ»: