Հայաստանի ՍԴՀԿ «Տխրունու» Ուսանողական-Երիտասարդական Միութիւնը հանդէս եկաւ յայտարարութեամբ՝ անդրադառնալով գրանցում չունեցող աշխատողներու հարցին, որոնք ներկայիս զրկուած են պետութեան կողմէ տրամադրուող նպաստներէն եւ նաեւ մի քանի այլ հարցերու, որոնք կը կարօտին իշխանութիւններու ուշադրութեան։
Յայտարարութեան մէջ ըսուած է.
«Հաշուի առնելով Հայաստանում հաստատուած արտակարգ դրութիւնը, համաշխարհային պանդեմիան, բարձր գնահատելով կառավարութեան կողմից ձեռնարկուող քայլերը ուղղուած բնակչութեան առողջութեան եւ կեանքի պաշտպանութեանը, միաժամանակ անցկացնելով ուսումնասիրութիւն Հայաստանի բնակչութեան սոցիալ-տնտեսական, հոգեբանական կարգավիճակի վերաբերեալ, խուսափելով անհարկի խորհրդատուութիւններից (գիտակցելով, որ հաստատուած իրավիճակում եւ դրական եւ բացասական հետեւանքների ամբողջական պատասխանատուութիւնը կրելու է ներկայ իշխանութիւնը)՝ «տխրունի», ուսանողական-երիտասարդական միութիւնը կոչ է անում .
-Հաշուի առնել, որ պետական գրանցում չունեցող աշխատողները նոյնպէս ՀՀ քաղաքացիներ են եւ արտակարգ դրութեան պայմաններում (որը նախնական տուեալներով տեւելու է շուրջ 1 ամիս) ՀՀ քաղաքացիները զրկուած են լինելու եկամտի աղբիւրից եւ կանգնելով երկընտրանքի առաջ՝ մահ սովից, թէ հաւանական մահ հաւանական վարակումից. վստահեցնում ենք, որ քաղաքացիները կ’ընտրեն երկրորդ տարբերակը, ինչը կը բերի հասարակական կեանքի հաւասարաչափութիւնների լուրջ խախտումների, կը նպաստի համավարակի մեծ տեմպերով տարածմանը եւ միաժամանակ կարող է բերել պետական համակարգի անհաւասարակշռութեան,
-Նկատի ունենալ, որ աշխատողների գրանցման կամ գրանցումից խուսափման խնդիրը հանդիսանում է աշխատող-գործատու յարաբերութիւնների արդիւնք, որտեղ պետութիւնը պարտաւոր է հանդէս գալ կողմերի յարաբերութիւնների կարգաւորման դիրքից եւ այսօր աշխատանքային դաշտում մեր ունեցած խնդիրները երեկուայ պետական համակարգի բացթողումների հետեւանք են,
-Վերանայել 31.03.2020 թ.-ին ԱԺ արտահերթ նիստով ընդունուած «արտակարգ դրութեան իրաւական ռեժիմի մասին» օրէնքը, քանզի այն հանդիսանում է արտակարգ դրութեան պայմաններում անձնական տուեալների պաշտպանութեան, մասնաւոր եւ ընտանեկան կեանքի անձեռնմխելիութեան, հաղորդակցութեան ազատութեան եւ գաղտնիութեան իրաւունքների կոպիտ խախտում,
-Նկատի ունենալ ներկայ պայմաններում գիւղական համայնքներում գիւղմթերքի իրացման դժուարութիւնները, ինչը հանդիսանում է գիւղական համայնքների բնակիչների հիմնական եկամտի աղբիւր (ինչպէս յայտնի է բոլորիս գիւղատնտեսները չեն հանդիսանում պետական գրանցմամբ աշխատողներ),
-Նկատի ունենալ, որ նուազագոյն աշխատավարձի տրամադրումը չի լուծելու նոյնիսկ 3 հոգանոց ընտանիքի առաջին անհրաժեշտութեան ծախսերի մինիմումը, քանզի հաշուարկային նուազագոյնը եւ մարդկանց առաջին անհրաժեշտութեան ծախսերի նուազագոյնը չեն համապատասխանում,
-Նկատի ունենալ, որ երկրի կենտրոնացման հետեւանքով բազմաթիւ քաղաքացիներ աշխատանքի համար իրականացնում են ճօճանակային միգրացիայ եւ այս օրերին հասարակական տրանսպորտի դադարեցումը առանց հասանելի այլընտրանքի յանգեցնելու է հարկադրուած պարապուրդի այն քաղաքացիներին, որոնք ապրում են աշխատանքի վայրից հեռու։
ՏՈԵՄ-ը ակնկալում է ՀՀ կառավարութեան եւ Պարէտատան շուտափոյթ գործնական արձագանքին որպէս հանրապետութիւնում իրավիճակի պատասխանատուներ։
Պատասխանատու մարմինների պատրաստակամութեան դէպքում ՏՈԵՄ-ը պատրաստ է հանդէս գալ նշուած խնդիրների շուրջ իր առաջարկութիւններով»։
