Ուրբաթ օր, Միացեալ Նահանգներու Ներկայացուցիչներու Տունը հաստատեց տնտեսութեան աջակցութեան օրինագիծը, որ երկու օր առաջ միաձայնութեամբ քուէարկուած էր Ծերակոյտին կողմէ:
«Քորոնա» ժահրի համաճարակին պատճառաւ ստեղծուած տնտեսական տագնակը կանխելու նպատակաւ, երկու դրիլիոն տոլարի աջակցութիւն պիտի տրամադրուի տնտեսութեան բազմաթիւ ճիւղերուն ու նաեւ անհատ քաղաքացիներուն:
Գոնկրէսի օրինագիծին համաձայն յառաջիկայ շաբաթներուն 1200 տոլար անմիջական օգնութիւն պիտի ուղարկուի բոլոր այն ամերիկացիներուն, որոնց տարեկան եկամուտը մինչեւ 75 հազար տոլար է: 75-99 հազար տոլար եկամուտ ունեցողները կը ստանան աւելի նուազ գումար: Ընտանիքները պիտի ստանան 2400 տոլար, իսկ իւրաքանչիւր երեխայի համար` յաւելեալ 500 տոլար: 99 հազար տոլարէն աւելի եկամուտ ունեցողներուն բաժին պիտի չհասնի այս նպաստներէն:
Գործազրկութեան մատնուած անհատներու նպաստները պիտի երկարաձգուի չորս ամիսով ու նաեւ պիտի ստանան շաբաթական յաւելեալ 600 տոլար:
1200 տոլար օժանդակութիւնը պիտի տրուի նաեւ ընկերային տարբեր տեսակի նպաստներ` Social Security եւ SSI ստացողներուն:
Այս նպաստէն պիտի կրնան օգտուիլ նաեւ այն Ամերիկացիները, որոնք կը բնակին արտասահմանի մէջ: Հետեւաբար, Հայաստան բնակող Ամերիկայի քաղաքացիները (ոչ կրին քարտ ունեցողներ), որոնք 2018-ին եւ կամ 2019-ի հարկային փաստաթուղթեր (tax return) լրացուցած են պիտի կրնան օգտուիլ այս նպաստներէն:
Այս օրինագծով գործազրկութեան նպաստ պիտի տրամադրուի նաեւ անոնց, որոնք կը գործէին ազատ պայմանագրով (Independent Contractor) եւ կը ստանային 1099 հարկային փաստաթուղթը: Անցեալին, այս դասաւորման մէջ գտնուողները իրաւունք չունէին գործազրկութեան նպաստի դիմելու: Այս փոփոխութիւնը առիթ կու տայ Uber-ի եւ Lyft-ի վարորդներուն եւ այլ նման աշխատանքներով զբաղողներուն, օգտուելու պետական նպաստներէն:
Յայտնենք որ, Մարտ ամսուայ առաջին երեք շաբաթներուն միայն, մօտ 4 միլիոն ամերիկացիներ դիմում ներկայացուցած են աշխատանք կորսնցնելու պատճառաւ նպաստ ստանալու համար:
Տնտեսական աջակցութեան ծրագիրը 500 պիլիոն տոլարի օժանդակութիւն պիտի յատկացնէ ամենէն աւելի տուժած տնտեսութիւններունª օդանաւային ընկերութիւններուն, ճաշարաններուն եւ այլ վաճառատուներուն, պայմանաւ որ անոնք շարունակեն վճարել իրենց պաշտօնեաներու աշխատավարձերը:
Պիլիոնաւոր տոլարներ պիտի տրուին նաեւ հիւանդանոցներուն, դպրոցներուն, նահանգային եւ տեղական կառավարութիւններուն:
