«Ազատութիւնը» զրուցած է Լեռնային Ղարաբաղի նախագահի թեկնածու, նախկին վարչապետ Արայիկ Եարութիւնեանի հետ։
«Ազատութիւն»․ – Յատկապէս նախորդ օրերին Ֆէյսպուքի հայկական հատուածում շատ է քննարկուում, թէ արդեօք անհրաժեշտ է չեղարկել Արցախում ընտրութիւնները։ Դուք վտանգ չէ՞ք տեսնում, չէ՞ք կարծում, որ պէտք է չեղարկել, յետաձգել Արցախում կայանալիք ընտրութիւնները։
Յարութիւնեան․ – Անկախ մասնակցում եմ թէ չէ, անկախ առաջադրուել եմ թէ չէ՝ ես, որպէս Արցախի քաղաքացի, միանշանակ կողմ եմ ընտրութիւնները կազմակերպելու։ Ինչո՞ւ։ Քանի որ, նախ, մենք չենք իմանում սա ինչքան է տեւելու, եւ միւս հարցը՝ գոնէ վտանգի առումով ամենաբարենպաստ ժամանակը այսօր է, օր-օրի աւելի է վտանգուելու։ Ինչքա՞ն ժամանակ չեղարկենք, սահմանադրական ճգնաժամ է առաջանում։ Երկրորդ խնդիրը, համաշխարհային տնտեսական աղէտ է սպասուում, ոչ թէ ճգնաժամ։ Ինչպէ՞ս ենք դիմակայելու։ Եւ ամենավտանգաւորն այն է, որ շատ մեծ ներդրումային ծրագրեր պէտք է իրականացնենք, իսկ այդ դրամագլուխը գնացող իշխանութիւնը չի ունենում։ Պէտք է արագ ձեւաւորել իշխանութիւն, եւ շատ շուտ եւ համարձակ քայլեր Հայաստանի իշխանութիւնների հետ միասին կատարենք։ Մեր առջեւ, բացի համաճարակից, սպասուում են նաեւ տնտեսական շատ լուրջ խնդիրներ, չափազանց լուրջ խնդիրներ։ Մեր պարէնային անվտանգութեան խնդիրն է կասկածի տակ։ Մենք դեռ չգիտենք, թէ քանի ամիս է տեւելու սա, եւ ինչպիսի իրավիճակ ենք ունենալու։ Իսկ այսօր որեւէ դէպք չկայ արձանագրուած։ Իսկ վտանգը աւելի շատ քարոզարշաւում է եղել։ Ընտրութիւնները կազմակերպելը մի քանի անգամ աւելի հեշտ է, այդ հակահամաճարակային, առողջապահական պայմանները ապահովելը աւելի հեշտ է, քան հանդիպումները նախընտրական։
«Ազատութիւն»․ – Բայց ընտրատեղամասերում կուտակումներ են լինելու, մարդիկ հաւաքուելու են․․․
Յարութիւնեան․ – Դա ամենահեշտն է կարգաւորել։ Մենք՝ ղարաբաղցիներս, պատերազմի ժամանակ այդ կարգուկանոնը պահում էինք՝ քանի մեթր հեռաւորութեամբ, ինչպէս լինել, ինչպէս դիրքաւորուել։ Ընդամէնը պէտք է ընտրատեղամասերում յստակ ցուցումներ լինեն։ Կտրուկ արգելուում է, որ կուտակումներ լինեն։ Երկրորդը, ինչպիսի յաճախականութեամբ։ Մենք հաշուի առնենք, որ նօսր բնակեցուած տարածք է Արցախը ընդհանուր առմամբ, եւ դրա համար աւելի հեշտ է։ Միայն Ստեփանակերտ քաղաքում ինչ-որ չափով եւ որոշ բնակավայրերում է, որ դրա անհրաժեշտութիւնը լինելու է։ Իսկ գիւղերում կարող է տասը րոպէն մէկ էլ մարդ չի մտնում։
