Home ՀԱՅԱՍՏԱՆ Մշտական Բնակութեան ՀՀ Եկողները, Առանց Մաքսատուրքի Աւելի Շատ Անձնական Գոյք Կը Կարողանան Բերել

Մշտական Բնակութեան ՀՀ Եկողները, Առանց Մաքսատուրքի Աւելի Շատ Անձնական Գոյք Կը Կարողանան Բերել

by MassisPost

Կառավարութեան որոշումով աւելի լաւ պայմաններ կը նախատեսուին Հայաստան վերադարձող քաղաքացիներուն համար, անձնական գոյքը առանց մաքսային վճարումներ կատարելու երկիր բերելու պարագային, յայտնած են վարչապետի աշխատակազմէն։

Գործադիրի այսօրուայ նիստին (ՊԵԿ) Պետական եկամուտներու կոմիտէի նախագահ՝ Դաւիթ Անանեան նշած է, որ ներկայիս հիմնական խոչընդոտը այն է, որ անձը արտօնութենէն կրնար օգտուիլ այն պարագային, եթէ վերջին 5 տարուայ  իւրաքանչիւր տարուայ ընթացքին 180 եւ աւելի օր պէտք է ՀՀ գտնուած չըլլար: Փոփոխութեամբ առաջարկուած է այդ պահանջը ձեւակերպել այսպէս՝ 5 տարի (1825 օր) ժամանակաշրջանին առնուազն 915 օր բացակայած է ՀՀ-էն:

Բացի այդ, Հայաստան հաստատուող, ճանաչուած կամ փախստականի եւ հարկադիր տեղահանուածի կարգավիճակ ստացած օտարերկրեայ ֆիզիքական անձեր կրնան արտօնութեամբ ներմուծել իրենց անձնական օգտագործման ապրանքները, եթէ մաքսային մարմիններ ներկայացնեն համապատասխան կարգավիճակը հաստատող փաստաթուղթ: Նախորդ բնակութեան երկրէն, Միութեան մաքսային տարածք ներմուծումը կը կատարուի 18 ամսուայ ընթացքին:

Դաւիթ Անանեան տեղեկացուցած է, որ անձը նախ պէտք է Հայաստան գայ առանց ապրանքներու եւ մաքսային մարմիններուն տեղեկացնէ, որ 60 օրուայ ընթացքին պիտի դիմէ  Անձնագրային եւ վիզաներու վարչութիւն, որեւէ կարգավիճակ ստանալու համար: Ըստ ՊԵԿ նախագահի, անձը կարգավիճակը ստանալէ յետոյ միայն պէտք է բերէ իր գոյքը:

Հարակից Նյութեր

Leave a Comment