ԵԽԽՎ համազեկուցողները կոչ կ’ընեն Հայաստանի իշխանութիւններուն Սահմանադրութեան եւ անոր առնչուող փոփոխութիւններու վերաբերեալ կարծիք հայցելու Վենետիկի յանձնաժողովէն: Այս մասին նշուած է ԵԽԽՎ Հայաստանի մշտադիտարկման համազեկուցողներ Անտրեյ Շիրչելի եւ Քիմմօ Քիլիւնէի յայտարարութեան մէջ:
Անոնք կը նշեն, որ Հայաստանի իշխանութիւնները որոշած են արտահերթ նիստ կայացնել՝ քննարկելու շարք մը փոփոխութիւններ, որոնք կը հանեն օրէնսդրական նախաձեռնութիւններու՝ Սահմանադրութեան համապատասխանելու հարցը ստուգելու համար ՍԴ դիմելու պահանջը:
«Շարք մը այլ հարցերու կողքին, սա կը փոխէ նաեւ Սահմանադրութեան փոփոխութեան գործընթացը: Բացի այդ, ներկայացուած է Սահմանադրութեան փոփոխութիւնը, որու նպատակը, կարծես թէ, ՍԴ քանի մը անդամներու պաշտօնավարումն անմիջապէս դադրեցնելն է»,- յայտարարած են համազեկուցողներ Անտրեյ Շիրչելը եւ Քիմմօ Քիլիւնէն, ապա շարունակած.
«Այս երկու հարցերը կարեւոր են, եւ առաջարկուող փոխոխութիւնները կրնան երկարաժամկէտ հետեւանքներ ունենալ սահմանադրական հիմնարկներու գործունէութեան վրայ: Այս ծիրէն ներս, ինչպէս նաեւ հաշուի առնելով ծագած հարցերը՝ մենք կոչ կ’ընենք Հայաստանի իշխանութիւններուն հնարաւորինս արագ կարծիք հայցելու Վենետիկի յանձնաժողովի սահմանադրական իրաւունքի փորձագէտներէն:
Մենք կը հաւատանք՝ այդ կարծիքը, որ կրնայ շատ արագ մշակուիլ արագացուած ընթացակարգով, արժէքաւոր կ’ըլլայ բոլոր կողմերու, այդ շարքին՝ հայաստանեան ընտրողներու համար՝ հանրաքուէ կայացնելու պարագային»:
