Յունուար 24-ին, Երեւանի մէջ կայացած է ՍԴՀԿ վարչութեան ներկայացուցիչներու եւ վարչապետ Նիկոլ Փաշինեանի գլխաւորած՝ Քաղաքացիական Պայմանագիր կուսակցութեան Վերահսկող Յանձնաժողովի ներկայացուցիչներու միջեւ հանդիպում։
ՍԴՀԿ-ի կողմէ ժողովին մասնակցած են Ռ. Կարապետեան (ատենադպիր), Դ. Մարտիրոսեան (քաղաքական դիւանի ղեկավար), Ռ. Սերոբեան (կազմակերպչական պատասխանատու), Ռ. Ստեփանեան (Տխրունի Ուսանողական-Երիտասարդական պատասխանատու)։ ՔՊԿ-ի կոմէ ներկայ եղած են՝ Ա․ Փամբուխչեան(ԱԺ պատգամաւոր, վարչութեան անդամ), Ռ. Պետրոսեան (Կոտայքի մարզպետ, վարչութեան անդամ), Ս. Ղազարեան (ԱԺ պատգամաւոր, ՔՊ վերահսկիչ խմբի անդամ)։
Մօտ երկու ժամ տեւողութեամբ քննարկուած են հետեւեալ հիմնական հարցերը.
-Արցախի հիմնախնդիրը
-Քաղաքական դաշտի վրայ գաղափարական ընդդիմութեան բացակայութիւնը եւ անոր վտանգները
-Հայոց պատմութեան անցեալի եւ ներկայի վերաարժեւորման խնդիրը եւ անոնց արտացոլումը դասագրքերու մէջ
-Զինուած Ուժերու արդիականացման եւ սոցիալական խնդիրները
-Հայաստան-սփիււռք յարաբերութիւնները եւ մէկ տասնեակէ աւելի այլ հարցեր։
Կողմերը եկած են փոխըմբռնման շարք մը պետական ազգանպաստ հարցերու շուրջ։
ՍԴՀԿ ներկայացուցիչներուն առաջարկուած է առաւել յաճախ մասնակցութիւն ունենալ իշխանութեան կողմէ կազմակերպուող քննարկումներուն եւ ծրագրային նախագիծերուն։
ՍԴՀԿ վարչութեան ներկայացուցիչները դրական գնահատած են հանդիպման ընթացքը եւ արդիւնքը։
ՍԴՀԿ-ն կը յայտնէ, որ ակտիւօրէն պիտի շարունակ հետեւիլ իշխանութեան գործունէութեան, պարբերաբար հանդէս գալով գնահատականներով, առաջարկութիւններով եւ առարկութիւններով։