Թուրքիոյ նախագահ Ռեճէպ Թայէպ Էրտողանը նախագահականի Բարձրագոյն խորհրդատուական խորհուրդի (Հանրային խորհուրդ) հետ քննարկած է աշխարհի մէջ Հայոց ցեղասպանութեան ճանաչման դէմ քայլերը։
Թրքական «Anadolu» գործակալութեան փոխանցմամբ՝ Թուրքիոյ նախագահի հանրային կապերու բաժնի պետ Ֆահրըտին Ալթունը նշած է, թէ հանդիպման ժամանակ խօսուած է 1915–ի հետ կապուած քայլերու մասին։ Ան շեշտած է, որ քննարկման ժամանակ համակարծիք եղած են, որ միջազգային որոշ շրջանակներ կ’ուզեն 1915–ի միջոցով թուրքերու մէջ պառակտում մտցնել։ «Էրտողանի գլխաւորութեամբ քննարկուած են նաեւ դիւանագիտական ճանապարհներով Հայոց ցեղասպանութեան ճանաչման դէմ աշխատանքներ իրականացնելու ուղիները»,–նշած է Ֆահրըտին Ալթունը:
