Գիւմրիի «Շիրակ» օդակայանին մէջ վարչապետ Նիկոլ Փաշինեանին ներկայացուեցան Հայաստան բերուած Սու-30ՍՄ բազմագործառոյթային գերժամանակակից օդանաւերը։
Վարչապետը յայտարարեց, որ այդ օդանաւերը տարուայ գլխաւոր ձեռքբերումն են. – «Այսօր շատ կարեւոր օր է մեզ համար, որովհետեւ ժամանում են մեր այս տարուայ գլխաւոր ձեռքբերումը համարուող «ՍՈՒ-30ՍՄ» մակնիշի գերժամանակակից բազմագործառոյթային ինքնաթիռներ, որոնց ձեռքբերման մտադրութեան մասին դեռ նախորդ տարի էինք յայտնել: Այսինքն՝ ժամանում է ինքնաթիռների առաջին խմբաքանակը, եւ այս ձեռքբերումը շրջադարձային նշանակութիւն ունի Հայաստանի Հանրապետութեան անվտանգութեան, մեր ժողովրդի ապահովման գործում»։
Թէ քանի օդանաւ ձեռք բերուած է, յայտնի չէ: «Շիրակ» օդակայանին մէջ կայանուածները չորս հատ են: Օդանաւերու առաջին թռիչքներն իրականացուցած են ռուս օդաչուները: Վարչապետը Պաշտպանութեան նախարարի հետ ծանօթացած է անոնց հնարաւորութիւններուն:
Գիւմրի այցելելէ առաջ վարչապետ Փաշինեանը իր ֆեյսպուքեան էջին տեղեկացուցած էր, որ ձեռք բերուած է նաեւ հակաօդային պաշտպանութեան Օսա-ԱԿ համալիրներու խոշոր խմբաքանակ:
Ձեռք բերուած զինուորական սարքերուն ծանօթանալէ ետք վարչապետը շրջած է Գիւմրիի մէջ Վերակառուցման ու զարգացման եւրոպական դրամատան վարկային միջոցներով հիմնանորոգուած ճանապարհներով, յետոյ մասնակցած ընկերային 18 բնակարաններու շահագործման յանձնելու արարողութեան: Ամերիկահայ բարերարներու հանգանակութիւններով արդէն երրորդ տարին է Գիւմրիի մէջ կը կառուցուի ընկերային բնակարաններ:
Փաշինեանն անակնկալ այց կատարած է նաեւ նորակառոյց մաքսատուն: Այստեղ կուտակուած մեքենաներու հերթը 3 քիլոմեթրէն աւելի էր: Վարչապետը մաքսատուն չկրցաւ հասնիլ. մաքսազերծման հերթի սպասողները ճանապարհը փակեցին ու ներկայացուցին իրենց դժգոհութիւնները` մեծ հերթերէն, մաքսազերծման ժամկէտներու սահմանափակումներէն, հերթի վաճառքէն։
Վարչապետը նշած է, որ տեղեակ է հերթերու վաճառքէն ու մարզային ոստիկանութեան պետի պաշտօնակատարին յանձնարարած է հսկողութիւն սահմանել: Թէ չէ, ինչպէս նկատեց Նիկոլ Փաշինեանը, «հերթ նայողներ» ալ կը յայտնուին։
Վարչապետը այցի աւարտէն ետք ֆեյսպուքեան էջին տեղեկացուցած է, որ մաքսատունը մինչեւ Դեկտեմբեր 31-ը պիտի աշխատի շուրջօրեայ: