Վարչապետ Նիկոլ Փաշինեանը ընդունած է Հայաստանի ֆութպոլի ֆետերացիայի նորընտիր նախագահ Արմէն Մելիքբեկեանը:
Վարչապետի աշխատակազմի տեղեկատւութեան եւ հասարակայնութեան հետ կապերու վարչութիւնը տեղեկացուցած է, որ ողջունելով ՀՖՖ նախագահը՝ վարչապետ Փաշինեանն իր խօսքին մէջ նշած է. «Ցանկանում եմ ասել, որ ֆութպոլը մեզ համար երեք պատճառով եւ երեք ուղղութեամբ շատ կարեւոր է՝ առաջինը՝ ֆութպոլի զարգացումը մեզ համար ռազմավարական նշանակութիւն ունի, որովհետեւ, կարծում եմ եւ յոյս ունեմ, որ Հայաստանի Հանրապետութիւնում արտայայտուած բովանդակային փոփոխութիւններն արտայայտութիւն կը գտնեն նաեւ ֆութպոլում, եւ ինչ-որ առումով մեր երկրում ֆութպոլը եւ Ֆութպոլի ազգային հաւաքականն իր արդիւնքներով կարտայայտի մեր ազգային եւ պետական յաւակնութիւնները եւ համարժէք կը լինի այդ յաւակնութիւններին: Երկրորդը՝ ես կարծում եմ, որ Ֆութպոլի ֆետերացիայի նախագահի երէկ կայացած ընտրութիւնը կարեւոր է, որովհետեւ կառավարութեան համար քորուփցիայի դէմ պայքարի ծիրից ներս էական է սփորթի ապաքրէականացումը եւ սփորտթի ախտազերծումը քորուփցիայից»:
«Երրորդը՝ ի հարկէ, հնարաւորութիւնների զարգացման առումով, որովհետեւ մենք ասել ենք, որ ամենակարեւոր հարցը, որ Հայաստանի Հանրապետութեան քաղաքացիների համար պիտի լուծուի, հնարաւորութիւնների զարգացումն է, եւ ֆութպոլն այն ոլորտներից է, որտեղ բազմաթիւ պատանիներ, աղջիկներ կարող են իրենց հնարաւորութիւնները զարգացնելու եւ օգտագործելու ներշնչանք գտնել, եւ շատ կարեւոր է, որ մենք Հայաստանի Հանրապետութիւնում ռէալ զարգացնենք ֆութպոլային ենթակառուցուածքը՝ նաեւ որպէս հանրային կեանքի կազմակերպման կարեւոր որոշիչ», – ըսած է Փաշինեանը։
ՀՖՖ նորընտիր նախագահ Արմէն Մելիքբեկեանն ալ իր հորթին նշած է. «Մենք ունենք տեսլական, մինչեւ 2025 թուականի մեր ռազմավարութեան մէջ նշուած է մեր տեսլականը՝ Հայաստանն առաւել ճանաչելի դարձնել ֆութպոլի միջոցով: Դա մեր տեսլականն է, եւ մենք այդ ճանապարհով գնալու ենք»
Վարչապետը նկատած է, որ ժամանակակից աշխարհի մէջ ֆութպոլն սկսած է ընկալուիլ ոչ միայն որպէս մարզաձեւ, այլեւ որպէս տնտեսութեան ճիւղ, եւ Հայաստանի մէջ ֆութպոլը նաեւ որպէս տնտեսութեան ճիւղ չէ զարգացած այն նոյն պատճառով, ինչ տնտեսութեան միւս ճիւղերու պարագային՝ մենաշնորհներ, չարաշահումներ, հնարաւորութիւններու սահմանափակումներ:
Անդրադառնալով ՀՖՖ նախագահի ընտրութիւններու մրցակցային բնոյթին՝ Նիկոլ Փաշինեանը նշած է. «Իրականում դա շատ դրական փոփոխութիւն է: Իսկապէս մենք գուցէ չէինք էլ նկատել, երկար տարիներ Ֆութպոլի ֆետերացիայի նախագահի ընտրութիւններ 1-ից աւելի թեկնածուով չեմ յիշում ընդհանրապէս եղել է Երրորդ հանրապետութեան պատմութեան մէջ, համենայն դէպս, տեսանելի անցեալում չի եղել: Այս առումով կարծում եմ՝ իսկապէս հենց սա է իմաստը, եւ Ձեր պատասխանատուութիւնն էլ շատ մեծ է, որովհետեւ, ըստ էութեան, Ձեր ընտրութեամբ Հայաստանում փորձարկւում է ֆութպոլի կառավարման եւ զարգացման նոր մոտել, որը նախադէպը չի ունեցել՝ աշխարհում գուցէ ունեցել է, բայց Հայաստանում մենք այդ նախադէպը չենք ունեցել, որովհետեւ Ֆութպոլի ֆետերացիայի նախագահները եղել են կամ իշխանութիւնների հետ սերտօրէն առնչուող մարդիկ, կամ ենթականեր են եղել, դրանց ես այսօր չեմ ուզում անդրադառնալ»:
Փաշինեանն ընդգծած է՝ յոյս ունինք նաեւ, որ Ֆութպոլի ֆետերացիայի գործունէութիւնը պիտի ըլլայ «մեր ռազմավարական պատկերացումների շրջանակում, հենց նկատի ունեմ իմ ասած ուղղութիւնները»:
