Հայոց ցեղասպանութիւնը ճանչցող թիւ 150 բանաձեւը կրկին արգելափակուած է ամերիկեան Ծերակոյտէն ներս: Այս անգամ բանաձեւի քննարկման դէմ արտայայտուած է հանրապետական ծերակուտական Տեյվիտ Փերտուն՝ վկայակոչելով «Թուրքիոյ հետ շարունակուող դիւանագիտական յարաբերութիւնները»: Ընդ որում, արգելափակելով փաստաթուղթը, ծերակուտականը որեւէ խօսք չէ ըսած անոր բովանդակութեան մասին, հակափաստարկներ չէ ներկայացուցած, ընդամէնը պնդած է՝ այն այս պահին ընդունիլը նպատակայարմար չէ:
«Երէկ պետական քարտուղար Փոմփէօն հանդիպած է ՆԱԹՕ-ի գործընկերներուն, այդ շարքին՝ Թուրքիոյ արտաքին գործոց նախարար Չաւուշօղլուին, որու հետ շատ թեմաներ ունէր քննարկելու: Գործող վարչակազմը կը շարունակէ աշխոյժ համագործակցութիւնը Թուրքիոյ հետ ամենաբարձր մակարդակով: Անցած շաբաթ էր, որ նախագահ Թրամփը հանդիպեցաւ նախագահ Էրտողանին», – յայտարարած է Փերտուն՝ շարունակելով․ – «Հաշուի առնելով այս դիւանագիտական ջանքերը՝ ես կ’արգելափակեմ այս բանաձեւը ա՛յս պահին. Եթէ այն հիմա ընդունուի, կը սասանէ երկկողմ յարաբերութիւններուն մէջ առկայ մարտահրաւէրները յաղթահարելու՝ մեր վարչակազմի ջանքերը»:
Փաստաթուղթն այս անգամ եւս շրջանառութեան մէջ դրած էր Նիւ Ճըրզիէն ընտրուած Ռոպերթ Մենենտըսը՝ կոչ ընելով արագացուած կարգով անցնիլ քուէարկութեան: Ազդեցիկ ծերակուտականը գործընկերներուն յիշեցուցած է՝ անցած ամիս Քոնկրէսի ստորին պալատը՝ Ներկայացուցիչներու տունը ձայներու գերակշռող մեծամասնութեամբ՝ 405 կողմ, 11 դէմ յարաբերակցութեամբ արդէն իսկ ճանչցած է Հայոց ցեղասպանութիւնը:
Դեմոկրատ Մենենտըսին պաշտպանած է նաեւ հակադիր ճամբարը ներկայացնող ծերակուտական Թետ Քրուզը, որ, ի դէպ, անցեալ շաբաթ ներկայ եղած էր նախագահներ Էրտողանի եւ Թրամփի ուաշինկթընեան հանդիպման:
«Թուրքիան ՆԱԹՕ-ի դաշնակից է եւ կարեւոր դաշնակից, բայց ընկերները եւ դաշնակիցները կրնան իրար ըսել ճշմարտութիւնը: Եւ մենք չենք յարգեր Ամերիկան ու մեր դաւանած արժէքները, եթէ կը վախնանք ըսել ճշմարտութիւնը եւ միտումնաւոր կը մասնակցինք անոր քողարկման», -ընդգծած է Քրուզը:
Ի տարբերութիւն Ներկայացուցիչներու տան, ուր ցանկացած փաստաթուղթ քուէարկութեան կը դրուի նախագահողի կողմէ, վերին պալատին մէջ 100 ծերակոյտներէն իւրաքանչիւրը կրնայ կասեցնել հարցը քուէարկութեան դնելու նախաձեռնութիւնը: Անցեալ շաբաթ Մենենտըսի նախաձեռնութիւնն արգելափակած էր մէկ այլ հանրապետական ծերակուտական՝ Լինտսի Կրահամը, կրկին վկայակոչելով Թուրքիոյ հետ ռազմավարական կապերը:
«Սա նորութիւն չէ ինծի համար», – արձագանգած է Մենենտըսը, ընդգծելով՝ ինչ ալ ըլլայ, պիտի շարունակէ պայքարը:
Սա Հայոց ցեղասպանութիւնը ճանչցող բանաձեւը Ծերակոյտէն ներս արգելափակելու արդէն երկրորդ փորձն էր վերջին մէկ շաբթուան մէջ:
«Ես այս հարցով վաղուց կը զբաղուիմ եւ պիտի չընկրկիմ», – յայտարարած է Ռոպերթ Մենենտըսը, – «Ես նոր չեմ առնչուիր այս հարցին, ես հետամուտ եմ Հայոց ցեղասպանութեան ճանաչման մօտ մէկ տասնամեակ, եւ միշտ ի յայտ կու գան որոշ պատճառներ, որոնք կը պնդեն, թէ տուեալ պահուն ցեղասպանութեան ճանաչումը նպատակայարմար չէ: Կը կարծեմ՝ ծագումով հայ ամերիկացիները եւ աշխարհը պէտք է իմանան՝ ով է այս հարցին կողմ, եւ ով՝ ոչ»:
