Կրթութեան Գիտութեան Մշակոյթի Սպորտի նախարար Արայիկ Յարութիւնեանի կարծիքով, տարբեր իրադարձութիւններ, արուեստի գործեր սատանիզմի հետ կապելը կ՛ուղղորդուի շարք մը շրջանակներու կողմէ:
«Հասկանալի է, թէ որտեղից են այդ քամիները փչում, այն մեդիակենտրոններից, որոնք վերահսկւում են Քոչարեանի կողմնակիցների, տարբեր քաղաքական ուժերի, «մերժուածների» կողմից, իհարկէ, կան հասարակական-քաղաքական խմբեր, որոնք ունեն նորմալ մտահոգութիւններ»,- «Ազատութեան» հետ հարցազրոյցի ընթացքին ըսած է նախարարը:
Նախարարը անդրադարձած է նաեւ Նոյեմբեր 2-ին Հանրապետութեան հրապարակի մետրոյին յարակից տարածքին վրայ բեմադրուած «ՅուԶանք ու Զանգ» ներկայացումին, որմէ ետք նախարարութիւնը յայտնուեցաւ հանրութեան ուշադրութեան կենտրոնը եւ հնչեցին դժգոհութեան, որ ֆինանսաւորուած է ոչ թէ արուեստ, այլ սատանիզմ եւ նոյնասեռականութեան քարոզ:
«Նման երեւոյթ յաճախ ենք տեսնում եւ այդ անուան տակ՝ ԼԳԲՏ, սատանիզմի անուան տակ որակում են իրադարձութիւններ, որոնք երբեմն ընկալելի ու հասկանալի չեն, գուցէ կատարման տեսակէտից վատն են, եւ շատ յստակ որոշակի մեդիակենտրոններ ու քաղաքական կենտրոններ դա թիրախաւորում են, դարձնում են օրակարգ, մինչդեռ կարծում եմ, որ եթէ այդտեղ որակի խնդիր կայ, դա մասնագէտների քննարկման հարց է: Դժուար թէ կարելի է խօսել արժէքների փոփոխութիւնների մասին, որովհետեւ մենք հսկայական քանակութեամբ դրամաշնորհներ ենք տրամադրում շատ տարբեր հարցերով՝ Արցախի, ազգային տարբեր հարցով, կրթական, մեր ազգային համակարգի»,- մանրամասնեց Յարութիւնեան:
Արայիկ Յարութիւնեանը նաեւ յորդորեց ՀՅԴ-ի երիտասարդական կառոյցին, որը մինչեւ Հինգշաբթի վերջնաժամկէտ տուած է նախարարին հրաժարական ներկայացնելու համար, չխօսել կրթութեան մասին:
«Ով ով խօսի կրթութիւնից եւ այս ոլորտից, «Դաշնակցութիւնը» եւ դաշնակներն իրաւունք չունեն դրան անդրադառնալու, ես նկատի ունեմ տեղի դաշնակցական կառոյցին, որովհետեւ արտասահմանում դաշնակցականների հետ շատ արդիւնաւէտ համագործակցում ենք: Եթէ որդեգրել էի, որ Լեւոն Մկրտչեանի եւ նրա գործընկերների բերած աւերածութիւնները կրթութեան ոլորտում չէի հանրայնացնելու, այս յայտարարութիւնից յետոյ ցոյց եմ տալու, թէ նրանք ինչ աւերածութիւններ են բերել կրթութեանը»,- ըսաւ նախարար Յարութիւնեան:
