ՅԱՅՏԱՐԱՐՈՒԹԻՒՆ
Ս.Դ.Հ.Կ. Կեդրոնական Վարչութիւնը կ’ողջունէ ԱՄՆ ներկայացուցիչներու տան՝ Հայոց Ցեղասպանութեան ճանաչումը ամրագրող թիւ 296 բանաձևի ընդունումը և իր երախտագիտութիւնը կը յայտնէ բոլոր այն ներկայացուցիչներուն, որոնք քուէարկեցին անոր ի նպաստ։
Պատմական այս բանաձևը ոչ միայն կը հաստատէ Հայոց Ցեղասպանութեան փաստը, այլ ամբողջովին կը մերժէ Ցեղասպանութեան ժխտման որևէ երեւոյթ կամ դրսևորում: Ան կը մղէ ԱՄՆ վարչակարգը որդեգրելու քաղաքականութիւն՝ Ցեղասպանութեան պաշտօնական ճանաչման, ոգեկոչման և իրազեկման վերաբերեալ:
Բանաձևի ընդունումը անտարակոյս արդիւնք է, մէկ կողմէն աշխարհաքաղաքական նոր իրողութիւններու և միւս կողմէն ամերիկահայ գաղութի քաղաքական կազմակերպուածութեան և տասնամեակներու վրայ երկարող աննահանջ աշխատանքին՝ դաշնակցային և նահանգային մակարդակներու վրայ:
Լիայոյս ենք, որ ԱՄՆ Ներկայացուցիչներու տան այս վճռական քայլը ազդակ կը հանդիսանայ ԱՄՆ Ծերակոյտին, որ այնտեղ ևս որդեգրուի այս բանաձևը և հասցնելով ԱՄՆ նախագահի ստորագրութեան անոր տրուի օրէնքի ուժ:
Այդպիսով, Ցեղասպանութեան ճանաչման հարցը վերջնականապէս դուրս կու գայ քաղաքական օրակարգէն և վերջապէս կը կարողանանք անցում կատարել մեր պահանջատիրութեան յաջորդ հանգրուանի՝ հատուցման ու վերականգնման կարեւորագոյն աշխատանքներուն:
Ս.Դ.Հ.Կ. Կեդրոնական Վարչութիւն
Հոկտեմբեր 29, 2019
