Պաշտօնական Անգարայէն կը շարունակեն արձագանգներ հնչել նախօրէին Միացեալ Նահանգներու Ներկայացուցիչներու տան կողմէ Հայոց ցեղասպանութիւնը ճանչցող բանաձեւի ընդունման վերաբերեալ:
«Այս որոշումը ոչ մէկ արժէք ունի: Մենք այն չենք ճանչնար», – յայտարարած է Թուրքիոյ նախագահ Ռեճէպ Թայէպ Էրտողանը իշխող «Արդարութիւն եւ զարգացում» կուսակցութեան խորհրդարանական խմբակցութեան նիստի ժամանակ՝ արձագանգելով նախօրէին ԱՄՆ-ի Ներկայացուցիչներու տան կողմէ Հայոց ցեղասպանութիւնը ճանչցող բանաձեւի ընդունման:
Էրտողանը ցաւով արձանագրած է, որ «իր երկրին ուղղուած զրպարտանքը» ընդունուած է ամերիկեան քոնկրէսի կողմէ: «Իրենք կը նուագեն, իրենք ալ կը պարեն: Մենք ըսած ենք՝ եկէք այս հարցը պատմաբաններուն ու հնագէտներուն թողնենք: Թող անոնք ուսումնասիրեն: Այս հարցին քաղաքական աստառ մի տաք: Մեր արխիւներուն մէջ մէկ միլիոնէն աւելի փաստաթուղթ կայ: Մինչեւ օրս հայերը ոչ մէկ արխիւ չեն կրցած ներկայացնել, քանի որ չկայ: Միայն դատարկ խօսքերով ոչինչի կը հասնի: Մեղաւոր ես ըսելով, մեզի չէք կրնար մեղադրել: Մենք չենք ճանչնար այս որոշումը», – ըսած է նախագահ Էրտողանը:
Միաժամանակ Անգարայի մէջ ԱՄՆ դեսպան Տեյվիտ Սաթըրֆիլտը կանչուած է ԱԳՆ բացատրութիւն տալու: Պաշտօնական Անգարայէն շարք մը պաշտօնեաներ քննադատական արձագանգներ հնչած են ԱՄՆ-ի Ներկայացուցիչներու տան ընդունած բանաձեւի վերաբերեալ:
Թուրքիոյ նախագահի խօսնակ Իպրահիմ Քալընը ամօթալի որակած է ամերիկեան քոնկրէսի որոշումը՝ նշելով, թէ «այս բանաձեւը, պատմութիւնը քաղաքականութեան գործիք դարձնելու եւս մէկ օրինակ է»:
«Թուրքիոյ ցեղասպանութիւն գործելու համար մեղադրողները նախ թող սեփական պատմութեանն ու իրենց աջակցած ահաբեկչական կառոյցներուն՝ ԱՍԱԼԱ-ի եւ Քիւրտիստանի բանուորական կուսակցութեան արիւնոտ անցեալին նային», – իր թուիթըրեան էջին մէջ գրած է Քալընը:
Ցեղասպանութեան մասին բարձրաձայնողներուն սեփական պատմութեան առերեսուելու կոչ ըրած է նաեւ Թուրքիոյ Արդարադատութեան նախարար Ապտուլհամիտ Կիւլը: Ան «անօգուտ նախաձեռնութիւն» համարած է բանաձեւի ընդունումը՝ յայտարարելով, թէ այն իրենց համար առ ոչինչ է:
Թուրքիոյ նախագահի աշխատակազմի հանրային կապերու բաժնի ղեկավար Ֆահրետտին Ալթունը եւս դատապարտած է ամերիկացի քոնկրէսականներու որոշումը: Ալթունը Թուիթըրի էջին գրած է, որ Հայոց ցեղասպանութիւնը ճանչցող բանաձեւի ընդունումը մտահոգիչ է բոլոր անոնց համար, որոնք կը կարեւորեն ԱՄՆ – Թուրքիա յարաբերութիւնները:
Թրքական իշխանութիւններու քննադատութեան հակառակ՝ Թուրքիոյ խորհրդարանի հայազգի պատգամաւոր Կարօ Փայլանը ողջունած է ԱՄՆ Քոնկրէսի որոշումը:
«Տասնեակ խորհրդարաններէ ետք ԱՄՆ Քոնկրէսը ճանչցաւ Հայոց ցեղասպանութիւնը: Մեր ցաւը դարձած է այլ խորհրդարաններու քննարկման առարկայ, քանի որ իմ երկիրը 105 տարի է կը հերքէ հայ ժողովուրդի Մեծ Եղեռնը: Միակ խորհրդարանը, որ կամոքէ հայ ժողովուրդի վէրքերը, Թուրքիոյ մեճլիսն է, որուն անդամը կը հանդիսանամ», – թուիթըրեան իր էջին գրած է Փայլանը:
Աւելի վաղ ԱՄՆ-ի Ներկայացուցիչներու տան կողմէ Հայոց ցեղասպանութիւնը ճանչցող բանաձեւի ընդունումը դատապարտած էր Թուրքիոյ արտաքին գործնոց նախարար Մեւլութ Չաւուշօղլուն:
Թուրքիոյ արտաքին քաղաքական գերատեսչութիւնն ալ յայտարարած էր, թէ կը մերժէ «ներքաղաքական նպատակներով ընդունուած՝ պատմական ու իրաւական հիմք չունեցող այս որոշումը»:
