Երեքշաբթի, Հոկտեմբեր 29-ին, Միացեալ Նահանգներու Ներկայացուցիչներու Տունը վաւերացուց թիւ 296 բանաձեւը, որ կու գայ ճանչնալու Հայոց Ցեղասպանութիւնը:
Բանաձեւին կողմ քուէարկեցին 405, դէմ 11 եւ ձեռնպահ 3 գոնկրէսականներ:
2000 թուականէն սկսեալ չորրորդ անգամ ըլլալով Հայոց Ցեղասպանութեան բանաձեւ կը ներկայացուէր Ներկայացուցիչներու Տունէն ներս, սակայն առաջին անգամ ըլլալով քուէարկութեան կը դրուէր ընդհանուր նիստին առջեւ: Գոնկրէսական Ատամ Շիֆ, որ Բանաձեւի հեղինակն էր, յայտարարեց, որ այս պահը արդէն իսկ ուշացած էր:
«Մենք չենք կրնար ընտրութիւն կատարել, թէ մարդկութեան դէմ որ ոճիրի մասին կարելի է խօսիլ», շեշտեց Ատամ Շիֆ:
Ընդունուած բանաձեւը կը պահանջէ որ, Միացեալ Նահանգները պաշտօնապէս ճանչնայ եւ յիշատակէ Հայկական ցեղասպանութիւնը եւ կը մերժէ Միացեալ Նահանգներու մասնակցութիւնը՝ Ցեղասպանութեան որեւէ ժխտումին:
«Այս պատմական օրը, մենք կ՛ողջունենք քաջարի եւ աննահանջ կեցուածքը Ներկայացուցիչներու Տան ղեկավարութեան, որոնք դիմադրեցին թրքական լոպպիին եւ ճանչցան պատմութեան ողբերգականական էջը», այս առթիւ յայտարարեց Հայ Ամերիկան Խորհուրդի ատենապետ Սեւակ Խաչատուրեան: «Այս բանաձեւը ոչ միայն պաշտօնապէս կը ճանչնայ Հայկական Ցեղասպանութիւնը , այլ եւ կ՛ամրացնէ Միացեալ Նահանգներու վաստակը որպէս երկիր, որ բարձր կը դասէ մարդկային իրաւունքները», աւելցուց ան: