Հայաստանը ընտրուած է ՄԱԿ-ի Մարդու իրաւունքներու խորհուրդի անդամ՝ 193 երկիրներու քուէարկութեամբ ստանալով 144 ձայն: Այս մասին իր ֆէյսպուքեան էջին գրառում կատարած է Հայաստանի վարչապետ Նիկոլ Փաշինեանը։
«Սա մեր երկրի նկատմամբ միջազգային հանրութեան շատ մեծ վստահութեան վկայութիւն է, յատկապէս մարդու իրաւունքների պաշտպանութեան հարցում: Շնորհաւորում եմ բոլորիս», – գրած է վարչապետը:
Արտաքին գործոց նախարարութեան լրատւութեան եւ հանրային դիւանագիտութեան վարչութեան հաղորդագրութեան համաձայն՝ 17 հոկտեմբերին Նիւ Եորքի մէջ ՄԱԿ Գլխաւոր վեհաժողովի նիստի ընթացքին կայացած ընտրութիւններու արդիւնքով Հայաստանը ընտրուած է Մարդու իրաւունքներու խորհուրդի (ՄԻԽ) անդամ 2020-2022 թուականներու ժամանակահատուածի համար։
Արեւելաեւրոպական երկիրներու տարածաշրջանային խումբին Մարդու իրաւունքներու խորհուրդի ընտրութիւններուն յատկացուած երկու թափուր տեղերու համար ներկայացուած էին երեք երկիրներու՝ Հայաստանի, Լեհաստանի եւ Մոլտովայի թեկնածութիւնները: Փակ գաղտնի քուէարկութեան արդիւնքով Հայաստանը, ստանալով 144 ձայն, ընտրուած է առաջին փուլով (Լեհաստան` 124, Մոլտովա` 103 ձայն)։ Ընտրուելու համար անհրաժեշտ էր ստանալ անդամ երկիրներու մեծամասնութեան քուէն, այն է՝ 97 ձայն։
«Ձայների գերակշիռ մեծամասնութեամբ ընտրութիւնը վկայում է միջազգային հանրութեան կողմից Հայաստանի Հանրապետութիւնում ժողովրդավարական վերափոխումների եւ մարդու իրաւունքների եւ հիմնարար ազատութիւնների պաշտպանութեան ու խրախուսման ոլորտում գրանցուած նշանակալի առաջընթացի ճանաչման մասին», – ըսուած է հաղորդագրութեան մէջ:
Նշենք, որ 2003 թուականին Հայաստանը երեք տարիով ընտրուած է ՄԱԿ-ի Մարդու իրաւունքներու յանձնաժողովի անդամ: Յանձնաժողովի գործունէութիւնը դադրած է 2006 թուականի մարտին:
