Վարչապետ Նիկոլ Փաշինեանի Ամերիկայի Միացեալ Նահանգներ այցի գլխաւոր միջոցառումը բազմամարդ հանրահաւաքն էր Լոս Անճելոսի կեդրոնական «Grand Park-ին» մէջ:
Լոս Անճելոսի եւ յարակից քաղաքներու հազարաւոր հայեր եկած էին լսելու Հայաստանի վարչապետին: Փաշինեանը դիմաւորեցին բուռն ծափահարութիւններով, վանկարկումներով:
Նիկոլ Փաշինեանը ծաւալուն ելոյթ ունեցաւ, ըսաւ, որ ժամանակն է նորովի խօսիլ Սփիւռքի հետ, նորոգել Հայաստան Սփիւռք կապերը:
«Մենք յոյս ունենք, որ ինչպէս Սփիւռքը կանգնեց Հայաստանում տեղի ունեցող քաղաքական յեղափոխութեան կողքին, այնպէս էլ Սփիւռքը կը կանգնի Հայաստանում տեղի ունեցող տնտեսական յեղափոխութեան կողքին», – իր ելոյթին մէջ յայտարարած է Փաշինեանը:
Աւելի վաղ Նիկոլ Փաշինեանը մամուլի ասուլիսով հանդէս եկաւ: Այս հարցուպատասխանի ամենաուշագրաւ դրուագը, թերեւս, վարչապետի մեկնաբանութիւնն էր՝ կապուած Ազգային անվտանգութեան ծառայութեան պետ Արթուր Վանեցեանի հրաժարականի աղմկայարոյց գրութեան հետ: Նիկոլ Փաշինեանը ըսաւ՝ նման յայտարարութիւն ընելը կը նշանակէ սպայի ուսադիրները նետել աղբամանը:
«Սերժ Սարգսեանի ընտանիքը արհեստավարժ քորումփացուած ընտանիք է եղել»
«Սերժ Սարգսեանի ընտանիքը փրոֆէսիոնալ քորումփացուած ընտանիք ա եղել ու իրանք բոլորը պէտք ա իրանց թալանածը վերադարձնեն: Մի մասը վերադարձրել են, միւս մասն էլ պիտի վերադարձնեն», – յայտարարած է ան:
Ամուլսարի մասին՝ «ես ճնշման տակ չեմ գործելու»
Վարչապետին հարց ուղղուեցաւ նաեւ Ամուլսարի մասին: Նիկոլ Փաշինեանը ըսաւ, որ դեռ վերջնական որոշում Հայաստանի կառավարութիւնը չէ կայացուցած:
«Ես համաձայն չեմ, որ կառավարութիւնը պէտք ա՝ ում ճնշումը ուժեղ եղաւ, նրա ճնշման տակ որոշում կայացնի: Համենայնդէպս ես երբեք ճնշման տակ չեմ գործել ու չեմ գործելու՝ անկախ ամէն ինչից», – յայտարարած է Փաշինեանը:
Օրուայ ընթացքին Փաշինեանը հանդիպումներ ունեցաւ նաեւ ազգային կուսակցութիւններու ներկայացուցիչներու, Քալիֆորնիոյ հայկական կազմակերպութիւններու ղեկավարներու մասնակցութեամբ՝ մեծ համաժողով, իսկ երեկոյեան ալ հանդիսաւոր ընդունելութիւն տեղի ունեցաւ ի պատիւ Նիկոլ Փաշինեանի եւ Աննա Յակոբեանի: Վարչապետը այստեղ եւս հանդէս եկաւ ելոյթով:
«Մեր հաւաքական ամենամեծ առաքելութիւնը մեր մեծութիւնը, մեծութեան մեր ինքնազգացողութիւնը վերկանգնելն է», – իր այս ելոյթին մէջ յայտարարեց Նիկոլ Փաշինեանը: