Home ԻՐԱՒՈՒՆՔ Դատախազութիւն. Սահմանադրական Դատարանի Որոշման Ուժով Քոչարեանը Ազատ Արձակելու Հիմքեր Չկան

Դատախազութիւն. Սահմանադրական Դատարանի Որոշման Ուժով Քոչարեանը Ազատ Արձակելու Հիմքեր Չկան

by MassisPost

Դատախազութիւնը կը համարէ, որ Սահմանադրական դատարանի Սեպտեմբեր 4-ի որոշման ուժով Հայաստանի երկրորդ նախագահ Ռոպերթ Քոչարեանի նկատմամբ յարուցուած քրէական հետապնդումը դադրեցնելու, անոր ազատ արձակելու հիմքեր չկան: Այս մասին ըսուած է Գլխաւոր դատախազութեան հանրային կապերու բաժնի տարածած պարզաբանման մէջ:

Նշելով, որ Սահմանադրական դատարանի յիշեալ որոշման «տրուել են մեկնաբանութիւններ, որոնք հիմնուած են դրա առանձին պարբերութիւնների մեկուսի դիտարկումների վրայ եւ չեն բխում որոշման իմաստից», Դատախազութիւնը, մասնաւորապէս, ընդգծած է. – «Ինչպէս արձանագրել է Սահմանադրական դատարանը, գործառութային անձեռնմխելիութիւնը ՀՀ քրէական դատավարութեան օրէնսգրքի 35-րդ յօդուածում որպէս քրէական վարոյթը բացառող հանգամանք նախատեսուած չէ: Հետեւաբար, բոլոր այն դէպքերում, երբ կը պարզուի, որ քրէական հետապնդումն անհամատեղելի է անձի գործառութային անձեռնմխելիութեան հետ, իրաւասու մարմինն առարկայականօրէն զրկուած կը լինի այդ հիմքով տուեալ անձի նկատմամբ քրէական հետապնդում չյարուցելու կամ արդէն իսկ յարուցուած քրէական հետապնդումը դադարեցնելու, ինչպէս նաեւ կալանք չկիրառելու վերաբերեալ օրինական որոշում կայացնելու իրաւական հնարաւորութիւնից, քանի որ բացակայում է նման որոշում կայացնելու դատավարական հիմքը: Աւելի պարզ՝ ՀՀ Սահմանադրական դատարանը ՀՀ քրէական դատավարութեան օրէնսգրքի 35-րդ յօդուածը խնդրայարոյց է համարել այնքանով, որքանով այն չի նախատեսում քրէական գործի վարոյթը կարճելու հիմք այն դէպքում, երբ կը պարզուի, որ անձն օգտւում է գործառութային անձեռնմխելիութիւնից եւ այն չի յաղթահարուել»:

«Կրկնելով, որ վերոգրեալը վերաբերում է բացառապէս այն դէպքերին, երբ պաշտօնաթող նախագահին մեղսագրւում են գործողութիւններ, որոնք բխում են նրա կարգավիճակից, անհրաժեշտ ենք համարում ընդգծել, որ ՀՀ պաշտօնաթող նախագահ Ռոպերթ Քոչարեանին չեն մեղսագրւում այնպիսի գործողութիւններ, որոնք բխում են նրա կարգավիճակից: Այդ հանգամանքը գնահատուել է վարոյթն իրականացնող քննիչի, դատախազի եւ դատարանների կողմից՝ իրենց իրաւասութեան շրջանակներում», – ըսուած է հաղորդագրութեան մէջ:

«Ռոպերթ Քոչարեանին առաջադրուած մեղադրանքը բաւարարում է իրաւաչափութեան լրացուցիչ եւ նախնական պարտադիր պահանջը. վերջինիս առաջադրուած մեղադրանքը չի առնչւում նրա գործառութային անձեռնմխելիութեանը, այն է՝ նրան մեղսագրուող արարքները չեն կարող դիտուել որպէս վերջինիս կարգավիճակից բխող», – շեշտած է Դատախազութիւնը:

Հարակից Նյութեր

Leave a Comment