Հայաստանի Հանրապետութեան վարչապետի մամուլի խօսնակ Վլատիմիր Կարապետեանը անդրադարձած է Արցախի Հանրապետութեան անվտանգութեան խորհուրդի նախկին քարտուղար Վիթալի Բալասանեանի վերջին յայտարարութիւններուն: 168.am-ի հարցին, թէ ինչպէ՞ս կը մեկնաբանէք Վիթալի Բալասանեանի յայտարարութիւններն ու ձեւակերպումները, ըստ որոնց՝ ՀՀ կառավարութեան ֆինանսաւորմամբ արցախեան ընտրութիւնները երկու հասարակական կազմակերպութիւններու կողմէ դիտարկելը «անմիջական միջամտութիւն է Արցախի ինքնիշխանութեանն ու Սահմանադրութեան», թէ՝ «Նիկոլ Փաշինեանի բոլոր գործողութիւնները քրէօրէն հետապնդելի են» եւ «ՀՀ-ի ե՛ւ խորհրդարանը բռնազաւթուած է, ե՛ւ իշխանութիւնը, ե՛ւ 2018 թուականի ԱԺ ընտրութիւնները եղած են անօրինական», Վլատիմիր Կարապետեանը պատասխանած է.
«Նախ հայաստանեան կազմակերպութիւնների կողմից արցախեան ընտրութիւնների ընթացքում դիտորդական առաքելութիւն իրականացնելու գաղափարը համաձայնեցուած է Արցախի իշխանութիւնների հետ: Ցանկացած ժողովրդավարական պետութիւն ինքն է շահագրգիռ, որ իր մօտ տեղի ունեցող ընտրութիւններին հնարաւորինս շատ դիտորդներ մասնակցեն, որովհետեւ դա մեծացնում է ոչ միայն ընտրութիւնների վստահելիութիւնը, այլեւ տուեալ երկրի միջազգային հեղինակութիւնը, եւ յոյս ունենք, որ Արցախում կայանալիք ՏԻՄ եւ համապետական ընտրութիւններում դիտորդական առաքելութիւն իրականացնելու համար Արցախի իշխանութիւնները կը հրաւիրեն միջազգային դիտորդների:
Բացի դա, ՀՀ վարչապետը Օգոստոսի 5-ին Ստեփանակերտի Վերածննդի հրապարակում Արցախի ժողովրդի առաջ պարտաւորուել է լինել նրանց ազատ կամքի արտայայտման երաշխաւորը, ինչը ցնծութեամբ է ընդունուել հաւաքի բազմահազար մասնակիցների կողմից: Եւ վերը նշուած որոշումն այդ պարտաւորութեան կատարմանն ուղղուած քայլերից է:
Ինչ վերաբերում է նրան, որ Վիթալի Բալասանեանը վարչապետ Փաշինեանին մեղադրում է իշխանութիւնը բռնազաւթելու մէջ, դա ըստ էութեան նշանակում է, որ Բալասանեանը Հայաստանի ժողովրդին է մեղադրում ՀՀ-ում իշխանութիւնը բռնազաւթելու մէջ, որովհետեւ Հայաստանում տեղի ունեցած քաղաքական փոփոխութիւնների հեղինակը ժողովուրդն է: Իսկ ժողովրդին իշխանութիւն բռնազաւթելու մէջ կարող է մեղադրել միայն կեղծիքների, սպանութիւնների, քորուփցիայի միջոցով իշխանութիւնը նախկինում բռնազաւթած եւ ներկայումս իր դատին սպասող լուսանցքային խմբակի կողմից ոգեշնչուած անձը»:
