Այսօր կրնամ յայտարարել, որ Արցախի մէջ ունինք համերաշխութեան եւ փոխըմբռնման այնպիսի մթնոլորտ, որու պայմաններուն մէջ բոլոր քաղաքական ուժերը սպասուող համապետական ընտրութիւններուն կրնան առողջ եւ քաղաքակիրթ պայքար ծաւալել: Այս մասին ֆէյսպուքեան իր էջին մէջ գրած է Ազատ հայրենիք կուսակցութեան նախագահ Արայիկ Յարութիւնեանը՝ անդրադառնալով Արցախի մէջ տիրող ներքաղաքական իրավիճակին:
«Վերջին մի քանի ամիսներին մեր երկրում ծաւալուած ներքաղաքական զարգացումները չէին կարող իրենց բացասական հետեւանքները չունենալ հանրային տրամադրութիւնների վրայ:
Հասարակութեան շրջանում առկայ որոշակի լարուածութեան մասին ազդակներն ամէն օր ստանում էի թէ՛ կուսակցականների եւ թէ՛ տարբեր ընկերային խմբերի հետ իմ ամենօրեայ շփումների ժամանակ: Հաւատացնում եմ բոլորիդ, որ այս ընթացքում ջանք ու եռանդ չենք խնայել, որպէսզի երկրում վերականգնենք բնականոն վիճակը՝ Արցախը հեռու պահելով ամէն տեսակ ներքին ցնցումներից: Ի հարկէ, դրա պատճառով չենք խուսափել ո՛չ թիրախաւորումներից եւ ո՛չ էլ շահարկումներից, բայց, կարծում եմ, կարեւորը արդիւնքն է: Այսօր կարող եմ յայտարարել, որ Արցախում ունենք համերաշխութեան եւ փոխըմբռնման այնպիսի մթնոլորտ, որի պայմաններում բոլոր քաղաքական ուժերը սպասուող համապետական ընտրութիւններում կարող են առողջ եւ քաղաքակիրթ պայքար ծաւալել»,- գրած է Ա. Յարութիւնեանը:
Արցախի նախկին վարչապետի խօսքով՝ այս գործին մէջ, միանշանակ, իրենց անուրանալի դերը ունեցած են ՀՀ Վարչապետ Նիկոլ Փաշինեանի՝ Արցախ կատարած վերջին այցը եւ Ստեփանակերտի Վերածնունդի հրապարակին մէջ Եռամիասնութեան ուղղուած պատմական ելոյթը:
Ըստ Ա. Յարութիւնեանի՝ ներքին միասնականութեան պահպանման ուղղուած էին նաեւ Սամուէլ Բաբայեանի հետ իր ունեցած հանդիպումներն ու քննարկումները:
«Այս դէպքում եւս շահարկումներից զերծ չմնացինք: Կրկին պնդում եմ, որ այդ հանդիպումները հետապնդում էին բացառապէս կառուցողական նպատակ՝ հիմքում ունենալով երկրի շահը: Եւ ողջունելի է Սամուէլ Բաբայեանի յայտարարութիւնն այն մասին, որ, հանրահաւաքային պայքարի փոխարէն, իշխանութեան ձեւաւորման գործընթացի համար ընտրել են ընտրութիւններին մասնակցելու սահմանադրական ճանապարհը:
Ողջունելի է նաեւ Արցախի հանրապետութեան Արտաքին գործերի նախարար Մասիս Մայիլեանի՝ Արցախում օրինակելի ընտրութիւնների անցկացմանը իր պատրաստակամութիւնը բերելու վերաբերեալ յայտարարութիւնը:
Այս մթնոլորտը թոյլ է տալու ազատ, արդար եւ մրցակցային պայքարում Արցախում ձեւաւորել օրինական իշխանութիւններ՝ առանցքում ունենալով մայիսի 21-ին Մարտունի քաղաքի Յաղթանակի հրապարակում բնակիչների հետ ունեցած հանդիպման ժամանակ իմ կողմից հնչեցրած այն միտքը, որ ոչ մի ընտրութիւն աւելի մեծ արժէք չէ, քան միասնական լինելը:
Կեցցէ՛ Արցախը:
Կեցցէ՛ մեր միասնական ու հզօր Հայրենիքը»,- գրած է Ա. Յարութիւնեանը:
