Վերաքննիչ քրէական դատարանը մերժած է Ռոպերթ Քոչարեանի գոյքի վրայ դրուած կալանքի վերաբերեալ առաջին ատեանի դատարանի որոշման դէմ Դատախազութեան բողոքը։
2018 թուականի Յուլիս 30-ին կալանք դրուած էր Մարտ 1-ի գործով սահմանադրական կարգը տապալելու մէջ մեղադրուող Հայաստանի երկրորդ նախագահի գոյքի եւ դրամատնային հաշիւներուն վրայ: Այս տարուան Յունիս 7-ին Երեւան քաղաքի ընդհանուր իրաւասութեան դատարանը՝ դատաւոր Աննա Դանիբեկեանի նախագահութեամբ, մասնակի բաւարարած է պաշտպան Յովհաննէս Խուդոյեանի ներկայացուցած բողոքը՝ արձանագրելով Ռոպերթ Քոչարեանի իրաւունքներու խախտում: Դատախազութիւնը վերաքննիչ բողոք ներկայացուցած էր դատարանի այդ որոշման դէմ:
Վերաքննիչը՝ դատաւոր Արսէն Նիկողոսեանի նախագահութեամբ, Ուրբաթ օր հետաձգած էր դատական նիստը մինչեւ Չորեքշաբթի ժամը 12-ը՝ բողոքաբերի դիրքորոշումը եւ պարզաբանումները լսելու համար: Դատախազութեան ներկայացուցիչները մասնակցած էին նիստին:
Ռոպերթ Քոչարեանը եւս ներկայ եղած է դատական նիստին, ան կալանաւորուած էր Յունիս 25-էն:
