Աշխատանքային այցով Միացեալ Նահանգներ գտնուող Հայաստանի Ազգային ժողովի նախագահ Արարատ Միրզոյեանը Յուլիս 16-ին, հեղինակաւոր Աթլանթեան Խորհուրդի (Atlantic Council) կեդրոնին մէջ հանդէս եկած է ելոյթով՝ նուիրուած թաւշեայ յեղափոխութենէն ետք Հայաստանի մէջ տեղի ունեցած փոփոխութիւններուն եւ զարգացման հեռանկարներուն:
Ելոյթէն ետքշ ներկայ Ամերիկացի պետական եւ փորձագիտական շրջանակներու ներկայացուցիչներու հետ ծաւալած է շահագրգիռ քննարկում Հայաստանի արտաքին քաղաքականութեան, Հայաստանի մէջ սպասուող դատական համակարգի բարեփոխումներու, հայ-ամերիկեան երկկողմ օրակարգի զարգացման եւ այլ հարցերու շուրջ, կը հաղորդէ ԱԺ լրատւութեան եւ հանրութեան հետ կապերու վարչութիւնը:
ՀՀ ազգային ժողովի նախագահ Արարատ Միրզոյեան ԱՄՆ-ի գործընկերներուն տեղեկացուցած է, որ Հայաստանի տնտեսութիւնը վնասներ կը կրէ Իրանի դէմ պատժամիջոցներէն եւ որ Հայաստանը չի կրնար հրաժարիլ Իրանէն կազ գնելէն:
«Միացեալ Նահանգներու եւ Իրանի միջեւ առկայ լարուածութիւնը բացասաբար կ’անդրադառնայ Հայաստանի տնտեսութեան վրայ: Մենք կը ցանկանք, որ ԱՄՆ ճնշում չգործադրէ Հայաստանի վրայ՝ իրանական պատժամիջոցներու օրակարգին մէջ ներգրաւելու համար: Հայաստանը չի կրնար նման գին վճարել»,-ըսած է Միրզոյեանը:
Միրզոյեանը նկատած է, որ յարաբերութիւններու զարգացումը բարեկամ երկրի մը հետ պէտք չէ ըլլայ մէկ այլ բարեկամ երկրի հաշուոյն: ԱԺ նախագահը տեղեկացուցած է նաեւ, որ Հայաստանը հետաքրքրուած է ԱՄՆ-ի հետ յարաբերութիւնները զարգացնելով:
Միրզոյեանը իր «Ֆէյսպուք»-ի էջին տեղեկացուցած է, որ շատ հետաքրքիր եւ բուռն քննարկում տեղի ունեցած է:
Աթլանթեան Խորհուրդէն ներս խօսած են նաեւ Հայաստանի ներքին ու արտաքին օրակարգերու այլ կարեւոր հարցերու՝ Արցախեան հիմնախնդրէն մինչեւ դատաիրաւական բարեփոխումներ: Միրզոյեանը ընդգծած է Հայաստանի մէջ դատաիրաւական բարեփոխումներու անհրաժեշտութիւնը եւ կաշառակերութեան դէմ պայքարը: «Այսօրուայ իշխանութիւնը ունի ուժեղ քաղաքական կամք եւ հաւատարմութիւն ժողովրդավարական արժէքներու, կաշառակերութեան դէմ պայքարի եւ օրէնքի գերակայութեան հաստատման համար»,-ըսած է Միրզոյեանը:
Օրուայ ընթացքին Ազգային ժողովի խօսնակը National Endowment for Democracy կազմակերպութեան կառավարող խորհուրդի հետ քննարկած է քաղաքական հասարակութեան եւ մետիային աջակցութեան տրամադրման հարցը:
Ուաշինկթընի մէջ Հայաստանի դեսպանատունէն ներս Արարատ Միրզոյեանը ընդունած է Միջազգային հանրապետական հիմնարկի փոխնախագահ Սքոթ Մեսքիթը: Կողմերը քննարկած են Ազգային ժողովի կարողութիւններու զարգացմանն ուղղուած համատեղ ծրագրերու օրակարգը:
Օրուայ աւարտին ԱԺ նախագահի գլխաւորած պատուիրակութիւնը հանդիպած է Ուաշինկթընի մէջ հայ համայնքի ներկայացուցիչներու հետ եւ միտքեր փոխանակած Հայաստանի մէջ տեղի ունեցող վերջին զարգացումներու եւ խորհրդարանի աշխատանքներու վերաբերեալ: