Թուրքիոյ Ժողովուրդներու դեմոկրատական կուսակցութեան հայազգի պատգամաւոր Կարօ Փայլանը ներքին գործոց նախարար Սուլէյման Սոյլուին հարցադիմում ուղղած է՝ պահանջելով պարզաբանել, թէ ինչո՞ւ նախարարութիւնը կը միջամտէ պատրիարքական ընտրութեան գործընթացին:
Յունիս 27-ին նախատեսուած Պոլսոյ Հայոց պատրիարքի տեղապահի ընտրութիւնը յետաձգուած էր մինչեւ Յուլիս 4-ը Պոլսոյ նահանգապետարանէն պատրիարքարան ուղարկուած պաշտօնական գրութեան համաձայն:
Փայլանը նախարար Սոյլուէն պատասխան կ’ակնկալէ, թէ ի՞նչ հիմնաւորմամբ պետութիւնը կը փոխէ տեղապահի ընտրութեան ամսաթիւը: Յիշատակելով 2017 թուականին նահանգապետարանի կողմէ տեղապահական ընտրութիւնը չեղարկելու հանգամանքը՝ հայազգի պատգամաւորը պարզաբանում պահանջած է, թէ ինչո՞ւ եւ ի՞նչ իրաւունքով պետութիւնը կը միջամտէ հոգեւոր կառոյց հանդիսացող Հայոց պատրիարքարանի ներքին գործերուն:
Ընդգծելով, որ Մայիս 23-ին Թուրքիոյ Սահմանադրական դատարանը երկար տարիներ պետութեան կողմէ պատրիարքական ընտրութեան խոչընդոտումը կրօնական ազատութեան ոտնահարում որակած էր` Փայլանը վրդովմունք յայտնած է, թէ արդեօ՞ք այս քայլերով չի շարունակուիր խախտուիլ հայ համայնքի իրաւունքները:
«Պատրիարքարանի գործունէութիւնն ու պատրիարքական ընտրութիւնը կանոնակարգող 1863 թուականի Հայոց ազգային սահմանադրութեան որ դրոյթներուն հիման վրայ նախարարութիւնը կը միջամտէ պատրիարքի ընտրութեան», – հարցումին մէջ նշած է Փայլանը: