Դատական նիստերու դահլիճի փոքր ըլլալուն պատճառով ուշացումով սկսած է՝ Ռոպերթ Քոչարեանը ընդդէմ Նիկոլ Փաշինեանի գործով դատական նիստը։ Դատական նիստը տեղի ունեցած է Երեւան քաղաքի ընդհանուր իրաւասութեան դատարանի՝ Քանաքեռ նստավայրին մէջ:Ըստ դատաւոր Լիլիթ Սարգսեանի՝ չէին նախատեսած այսքան լրագրողի ներկայութիւն։
Յիշեցնենք, որ Ռոպերթ Քոչարեանի ներկայացուցիչ Հայկ Ալումեանի կողմէ հայցադիմում ներկայացուած է Երեւան քաղաքի ընդհանուր իրաւասութեան դատարան՝ հրապարակայնօրէն արտայայտուած զրպարտութենէն պատիւը եւ արժանապատւութիւնը պաշտպանելու պահանջի մասին:
Հայկ Ալումեանը հայցադիմումը ներկայացնելու ժամանակ ընդգծած է,որ դատարան դիմելու առիթներէն մէկը Նիկոլ Փաշինեանի արտայայտութիւնն է Ռոպերթ Քոչարեանին, անցած տարի, առաջին անգամ կալանքէն ազատելէն ետք։
«Կամ թէկուզ Ռոպերթ Քոչարեանին ազատ արձակելու մեկնաբանութիւնը: Ասում է՝ անձեռնմխելի է: Ի՞նչ է նշանակում անձեռնմխելի: Այսինքն, կարելի է մարդկանց սպանութիւնը կազմակերպել ու ասել՝ «Ես անձեռնմխելի՞ եմ»»,-ըսած էր Նիկոլ Փաշինեանը Ֆրանսա այցի ժամանակ։
Այս արտայայտութեան համար անոնք Նիկոլ Փաշինեանէն կը պահանջեն ներողութիւն ։
Դատաւորը հարց ուղղած է փաստաբանին՝ արդեօ՞ք այդ վիրաւորանք է, թէ զրպարտանք։ Ըստ Ալումեանի՝ կը համարեն եւ զրպարտանք , եւ վիրաւորանք։
Քանի որ Նիկոլ Փաշինեանի ներկայացուցիչ Գէորգ Կէօզալեանը յայտնած է, որ վարչապետը նկատի չէ ունեցած Ռոպերթ Քոչարեանը, այլ համակարգը, Հայկ Ալումեանը ըսած է, որ լիազօրուած է ետ վերցնել հայցը՝ եթէ Փաշինեանը յայտարարէ այդ։ Գէորգ Կէօզալեանն ալ պնդած է, որ կը յայտնէ իր վստահորդի խօսքը։
Դատական նիստը յետաձգուած է, որպէսզի ներկայացուի գրաւոր դիմում՝ հայցէն հրաժարելու մասին։
