Ապրիլեան քառօրեայ պատերազմի հանգամանքները քննող յանձնաժողովը աշխատանքը պիտի սկսի յաջորդ շաբթուընէ: Քննիչ յանձնաժողովի լիազօրութիւնները պիտի իրականացնէ Ազգային ժողովի պաշտպանութեան եւ անվտանգութեան հարցերու մշտական յանձնաժողովը, այն պիտի ղեկավարէ «Իմ քայլէն» պատգամաւոր Անդրանիկ Քոչարեանը:
«Յանձնաժողովի նախագահը՝ պարոն Քոչարեանը, նախատեսում է առաջին նիստը անցկացնել յունիսի 4-ին», – «Ազատութեան» հետ զրոյցի ժամանակ ըսած է «Իմ քայլը» խմբակցութեան ղեկավար Լիլիթ Մակունցը: – «Յանձնաժողովի աշխատանքները անցկացուելու են հիմնականում փակ: Յանձնաժողովը որոշում կը կայացնի, թէ որ չափով է հրապարակելու նիւթերը»:
Ազգային ժողովէն ներս քննիչ յանձնաժողով ստեղծելու անհրաժեշտութեան մասին վարչապետ Նիկոլ Փաշինեանը յայտարարած էր 20 Մայիսին: Խօսելով Հայաստանի եւ Ղարաբաղի միջեւ տարաձայնութիւններ հրահրող «նախկին կաշառակեր համակարգի որոշ ուժերու մասին»՝ գործադիրի ղեկավարը նշած էր՝ «հասունացել է 2016 թուականի ապրիլեան պատերազմի հանգամանքներն ուսումնասիրող Ազգային ժողովի քննիչ յանձնաժողով ստեղծելու ժամանակը»: Մինչեւ վարչապետ դառնալն ալ Փաշինեանը յայտարարած էր՝ քառօրեայ պատերազմը պատշաճ քննելու կարիք կայ:
Բացի պատգամաւորներէն՝ յանձնաժողովին մէջ պիտի ընդգրկուին նաեւ փորձագէտներ: Յանձնաժողովի անդամները առայժմ չեն մանրամասնած՝ որոնք են անոնք:
Քննիչ յանձնաժողովի անդամ, Բարգաւաճ Հայաստան կուսակցութեան պատգամաւոր Վարդան Վարդանեանի կարծիքով այդ հարցերը պիտի յստակեցուին առաջին նիստին: Պիտի գործէ նաեւ առանձին աշխատանքային խումբ, որ պիտի զբաղուի թեքնիք հարցերով: – «Պէտք է մանրամասն ուսումնասիրութիւն կատարուի ե՛ւ պատճառներու մասին, ե՛ւ հետեւանքներու մասին», – նշած է Վարդանեանը:
Իշխող «Իմ քայլը» խմբակցութեան պատգամաւոր, ազատամարտիկ Սասուն Միքայէլեանը կը վստահեցնէ՝ յանձնաժողովը պիտի պատասխանէ քառօրեայի հետ կապուած հանրութեան յուզող հարցերու մասին․ – «Մարդոց կասկածանքները պէտք է փարատուի էդ յանձնաժողովի միջոցով: Պիտի էն ձեւի էդ յանձնաժողովն աշխատի, որ նման բան դրանից յետոյ չլինի»:
Ապրիլեան պատերազմի զոհերու հարազատները օրեր առաջ «Ազատութեան» հետ զրոյցի ժամանակ ցանկութիւն յայտնած էին ընդգրկուելու յանձնաժողովին մէջ:
Ըստ նիւթերու պիտի հրաւիրուին նաեւ պաշտպանութեան ոլորտի նախկին ու ներկայ պաշտօնեաներ:
Ըստ օրէնքի յանձնաժողովը պիտի գործէ վեց ամիս: Պատգամաւորները կը վստահեցնեն՝ իրենց սկսած աշխատանքը պիտի տեղափոխուի իրաւական տիրոյթ, եթէ ուսումնասիրութեան արդիւնքով քարէօրէն պատժելի հանգամանքներ ի յայտ գան: