Home ԳԼԽԱՒՈՐ ԼՈՒՐԵՐ «Պէտք է Անյապաղ Փոխել Նաեւ Սահմանադրական Դատարանի Ամբողջական Կազմը». Նինա Կարապետեանց

«Պէտք է Անյապաղ Փոխել Նաեւ Սահմանադրական Դատարանի Ամբողջական Կազմը». Նինա Կարապետեանց

by MassisPost

Իրաւապաշտպան Նինա Կարապետեանցի համոզմամբ` անյապաղ պէտք է փոխուի Սահմանադրական դատարանի, Բարձրագոյն դատական խորհուրդի (ԲԴԽ), Վճռաբեկ, Վերաքննիչ դատարաններու ամբողջական կազմը, եւ եթէ ատոր համար պէտք է օրէնսդրական փոփոխութիւն, պէտք է ընել օրէնսդրական փոփոխութիւն։

«Ազատութեան» «Քաղաքականութիւնը ներսից» հաղորդման ժամանակ Կարապետեանցը նշած է՝ թէ՛ Մարտ 1-ի, թէ՛ բազմաթիւ այլ գործերով «Սահմանադրական դատարանը յանցագործ, յանցաւոր որոշումներ կայացուցած է»։

«Հասկանում եմ, որ հասարակութեանը շատ հետաքրքիր է Մարտի 1-ը, դա վէրքի նման անընդհատ շօշափւում է, բայց բազմաթիւ այլ գործերով Սահմանադրական դատարանը յանցագործ, յանցաւոր որոշումներ է կայացրել, եւ դրա ապացոյցներն ընտրութիւնների հետ կապուած բացարձակ անհիմն, միակողմանի եւ նախորդ յանցաւոր ռեժիմներին սպասարկող, հաճոյ որոշումներ ընդունելն է։ Հետեւաբար, այս ամբողջական կազմն, այո՛, այնտեղ կան շատ բարձր մասնագէտ իրաւաբաններ, ես դա ինձ թոյլ չեմ տայ անգամ վիճարկել, շատ բարձր որակի, բայց թէ ինչի՞ն են իրենք ծառայել տարիներ շարունակ, տասնամեակներ շարունակ, հետեւաբար, իմ խորին համոզմամբ, որեւէ մէկը Սահմանադրական դատարանում չի կարող մնալ այդ պաշտօնում, եւ պէտք է մտածել յեղափոխական միջոցներով, ճանապարհներով փոխել նաեւ Սահմանադրական դատարանը։ Ես հասկանում եմ, որ ամբողջական կազմը շատ դժուար է լինելու փոխել, ես կարծում եմ, որ, այո, անյապաղ պէտք է փոխուի ամբողջական կազմով, եթէ դրա համար պէտք է օրէնսդրական փոփոխութիւն, պէտք է անել օրէնսդրական փոփոխութիւն։ Սահմանադրական դատարան, Բարձրագոյն դատական խորհուրդ, Վճռաբեկ դատարան, Վերաքննիչ դատարան՝ առնուազն էս պահին պէտք է փոխենք էդ բարձր, վերեւի ատեանները, որոնք հնարաւորութիւն կը տան ապահովել վերահսկողութիւնն առաջին ատեանից եկող որոշումների, յետոյ անցնել առաջին ատեանի», – ըսած է Կարապետեանցը։

Նախկին դատաւոր, փաստաբան Պարգեւ Օհանեանն ալ ընդգծած է՝ խնդիրը անձերու մէջ չէ։

«Ես գտնում եմ, որ անձերի մէջ չի ստեղ խնդիրը։ Ի հարկէ անձերը դեր են խաղում, երբեմն՝ շատ ազդեցիկ, բայց, գիտէք ինչ, ամենասուրբ մարդը, ամենամաքուր մարդը, եթէ յայտնւում է ինչ-որ մի միջավայրում, էդ միջավայրն ազդում է չէ՞ իր վրայ։ Եթէ ինչ-որ ճահիճի միջով ես անցնում, չես կարող չցեխոտուել, դու պէտք է մտածես ոնց անես, որ չխրուես, բայց ցեխոտուել՝ ռէալ, պէտք է ցեխոտուես», – ըսած է նախկին դատաւորը։

Հարցին, թէ «որքան բարձր է պաշտօնդ այդ համակարգում, այնքան ցեխոտուա՞ծ ես», Օհանեանը պատասխանած է. – «Չէ՛, էդպէս չի կարելի ասել։ Հիմա ես ուրիշ բան ասեմ՝ տեսէք, Դուք հարց տուեցիք, ասում էք՝ «Բարձրագոյն դատական խորհրդում նշանակուած են նախկին իշխանութիւնների կողմից», հարցն անձերը չեն, այնտեղ առանձին-առանձին վերցրած, ինչպէս եւ Սահմանադրական դատարանում, լուրջ մասնագէտներ են, բայց ինքը՝ կառոյցը, կամ էդ հիմնարկը ինքը լուրջ խնդիր է մեր արդարադատութեան համար, նոյնն էլ՝ Սահմանադրական դատարանը, եւ Աստուած չանի, եթէ Սահմանադրական դատարանն էս դիմումն ընդունեց վարոյթ, ես կարծում եմ, որ էս գործը մտնելու է փակուղի, որովհետեւ դա լինելու է անօրինական որոշում»։

Հարակից Նյութեր

Leave a Comment