Աւելի լաւ է ունենալ ուշացած անցումային արդարադատութիւն, քան՝ ձախողած, «Ազատութեան» «Կիրակնօրեայ վերլուծական Հրայր Թամրազեանի հետ» հաղորդման ժամանակ ըսած է Ազգային ժողովի պետաիրաւական հարցերու մշտական յանձնաժողովի նախագահ, «Իմ քայլը» խմբակցութեան պատգամաւոր Վլատիմիր Վարդանեանը։
Հարցին, թէ բարեփոխումները անհրաժեշտ են, բայց ինչո՞ւ այսքան ուշ, «այնպիսի տպաւորութիւն է ստեղծւում, որ եթէ չլինէր դատաւոր Դաւիթ Գրիգորեանի՝ Հայաստանի երկրորդ նախագահ Ռոպերթ Քոչարեանին կալանքից ազատ արձակելու որոշումը, այս հարցը այսքան հրատապ չէր դառնայ», Վարդանեանը այսպէս պատասխանած է. – «Հաւատացնում եմ Ձեզ, որ անցումային արդարադատութեան գործիքակազմի ներդրման հետ կապուած Հայաստանի Հանրապետութիւնում լսումները նախատեսուած էին շատ աւելի վաղ, քան Ձեր կողմից մատնանշուած իրադարձութիւնների վրայ հասնելը, եւ ես չեմ մտածում, որ մենք այստեղ յապաղել ենք, որովհետեւ մօտեցումն այն ժամանակ էլ, այս պահին էլ հետեւեալն է՝ աւելի լաւ է ունենալ ուշացած անցումային արդարադատութիւն, քան ձախողած անցումային արդարադատութիւն։ Այս տեսանկիւնից չեմ կիսի Ձեր գնահատականը, որովհետեւ աշխատանքները տարւում էին։ Անցումային արդարադատութեան հետ կապուած լսումները մենք մօտաւորապէս ամիս, ամիսուկէս առաջ նախաձեռնեցինք Ազգային ժողովում, յստակեցրեցինք ձեւաչափը, հրաւիրեցինք մասնակցելու հասարակական տարբեր կազմակերպութեան ներկայացուցիչներին, քաղհասարակութեան հիմնարկներին, հրաւէրք էր ուղղուած նաեւ դատական իշխանութեան ներկայացուցիչներին, նրանք ներկայ էին նաեւ լսումներին, բաւականին աշխոյժ, եւ սա մի գործընթաց է, որը որեւիցէ եղանակով չի կարելի կապել այդ իրադարձութեան հետ, պատճառահետեւանքային կապ նոյնիսկ եթէ կայ, դա պատահական է»։
Ազգային ժողովի պետաիրաւական հարցերու մշտական յանձնաժողովի նախագահի խօսքով՝ անկախ դատական իշխանութիւն ունենալու համար շատ մեծ ջանքեր ներդնել պէտք չէ։
«Անկախ դատական իշխանութիւն ապահովելու համար անհրաժեշտ է նախեւառաջ քաղաքական կամք, համակարգային եւ օրէնսդրական համապատասխան լուծումներ եւ որոշակի երաշխիքներ։ Մենք այստեղ յապաղելու տեղ չունենք, մենք չունենք սխալուելու հնարաւորութիւն, սա մէկ առիթ է, մենք չենք կարող ունենալ ձախողած անցումային արդարադատութիւն, յետոյ եւս մէկ անգամ դիմենք անցումային արդարադատութեանը։ Մի հատ էլ կարեւոր շեշտադրում, եթէ թոյլ տաք. շատ դէպքերում մարդկանց թւում է, որ անցումային արդարադատութեան գործիքակազմը կիրառելի է միայն երրորդ աշխարհի երկրների նկատմամբ, պէտք է նշեմ, որ ոչ, ցանկացած պետութիւն կարող է կանգնել անցումային արդարադատութեան խնդրի առջեւ, որովհետեւ դա որոշակի ժամանակահատուածում տեղի ունեցած իրադարձութիւնների գնահատումն է, այսինքն՝ մենք գործ ունենք իրադարձութիւնների հետ եւ իրավիճակ պէտք է ստեղծենք, որպէսզի մենք կարողանանք վերականգնողական արդարադատութեան միջոցով անցում կատարենք սխալից դէպի ճիշդ», – ըսած է Վարդանեանը։
