Պրիւքսէլի մէջ Արեւելեան գործընկերութեան տասնամեակին նուիրուած գագաթնաժողովի աւարտին Եւրոմիութեան ու ծրագրի անդամ վեց երկիրներու արտաքին գործոց նախարարները չեն յաջողած միասնական փաստաթուղթ ընդունիլ. Պաքուն հրաժարած է ստորագրելէ հռչակագիրը, քանի որ գրութեան մէջ որեւէ յիշատակում չէ եղած Ատրպէյճանի տարածքային ամբողջականութեան մասին:
Եւրոպացի առաջնորդները մերժած են Պաքուի պահանջն ու փաստաթուղթը թողած են այնպէս, ինչպէս իրենք նախատեսած էին:
Ատրպէյճանի արտաքին գործոց նախարարը հաստատած է, որ Պրիւքսէլի առաջարկած ձեւակերպումները անընդունելի եղած են Պաքուի համար:
Հայաստանի արտաքին գործոց նախարար Զոհրապ Մնացականեանը, մինչդեռ, Պրիւքսէլի մէջ պատասխանելով լրագրողներու հարցերուն, ընդգծած է, որ Հայաստանը գոհ է յոբելեանական գագաթնաժողովի արդիւնքներէն:
«Մենք սկզբունքօրէն գոհ ենք արդիւնքներից։ Ինչ վերաբերում է ամփոփիչ յայտարարութեանը, այն եղել է Մոկերինիի կողմից, որը արտայայտում է անդամ պետութիւնների եւ Հայաստանի մօտեցումները», – նշած է Հայաստանի արտաքին գործոց նախարարը։
