ՀՀ Ազգային ժողովի «Իմ քայլը» խմբակցութեան ղեկավար Լիլիթ Մակունցը եւ շարք մը այլ պատգամաւորներ հանդէս պիտի գան Սահմանադրական փոփոխութիւններ կատարելու գործընթաց նախաձեռնելու առաջարկութեամբ: Մակունց այս մասին յայտարարած է 18 Ապրիլին, Ազգային ժողովի նիստի ընթացքին:
«Պատասխանելով խորհրդարանական ընդդիմութեան կողմից բարձրացուած խորհրդարանական վերահսկողութեան ամրապնդմանն ուղղուած հարցադրումներին, յայտնում եմ, որ շուտով ես եւ «Իմ քայլը» խմբակցութիւնից մի շարք այլ պատգամաւորներ հանդէս ենք գալու Սահմանադրական փոփոխութիւններ կատարելու գործընթաց նախաձեռնելու առաջարկութեամբ, որի նպատակն այլ հարցերի հետ մէկտեղ լինելու է կառավարութեանը եւ վարչապետին ենթակայ մարմիններին ԱԺ հերթական նիստերին պատգամաւորների հարցերին պատասխանելու հրաւէրը:
Այսպիսով, այն, ինչ վերջին շրջանում բնութագրուել է, որպէս անհնար կամ մի բան, որին խորհրդարանական մեծամասնութիւնը դէմ է, ինչպէս տեսնում էք՝ իրականութեանը չի համապատասխանում: Եւ ուրեմն, չնայած՝ Ազգային անվտանգութեան ծառայութեանը, Ոստիկանութեանը, Պետական եկամուտների կոմիտէն Ազգային ժողովի հարցուպատասխանին մասնակից դարձնելու ցանկութիւնը մեր ընդդիմադիր գործիչներինն էր, այս ուղղութեամբ համատեղ աշխատանքների առաջարկը համարուեց անիրատեսական: Այդ պատճառով, կարեւորելով նշուած կառոյցների հանրային հաշուետուողականութիւնը, մենք ինքներս ենք նախաձեռնելու նրանց Ազգային ժողով հրաւիրելու համար անհրաժեշտ փոփոխութիւններ ձեռնարկելը»,- նշած է Մակունցը:
