Home ՀԱՅԱՍՏԱՆ Վարչապետը Ընդունած է Օփերայի եւ Պալէի Թատրոնի Ներկայացուցիչները

Վարչապետը Ընդունած է Օփերայի եւ Պալէի Թատրոնի Ներկայացուցիչները

by MassisPost

Մշակոյթի նախարարի պաշտօնակատար Նազենի Ղարիպեանը  պիտի չներկայացնէ Ալեքսանտր Սպենդիարեանի անուան օփերայի եւ պալէի ազգային ակադեմիական թատրոնի նոր տնօրէնը, եւ այդ պաշտօնը ժամանակաւորապէս պիտի կատարէ թատրոնի փոխտնօրէններէն մէկը:

Այս մասին լրագրողներուն յայտնած է թատրոնի երաժշտական ղեկավար (տիրիժոր) Յարութիւն Արզումանեանը՝ վարչապետ Նիկոլ Փաշինեանի հետ հանդիպումէն ետք:

1 Ապրիլին, առաւօտեան ժամերէն Կառավարութեան շէնքի դիմաց բողոքի ցոյցի դուրս եկած էին օփերայի եւ պալէի թատրոնի արուեստագէտները՝ խնդրելու չեղարկել տնօրէն Կոսթանթին Օրբելեանին աշխատանքէն ազատելու վերաբերեալ Մշակոյթի նախարարի պաշտօնակատարի հրամանը, ինչպէս նաեւ ազատել Ղարիպեանը զբաղեցուցած պաշտօնէն:

Թատրոնի քանի մը աշխատակիցներէ բաղկացած խումբը վարչապետի հետ հանդիպումէն գոհ էր. փոխհամաձայնութեան եկած էին քանի մը հարցերու շուրջ:

«Երբ մենք այսօր կը ստանանք այն օրէնքի կէտերը, այն խնդիրները, որոնք նախարարութիւնը ներկայացրել է պարոն վարչապետին, որ ցուցակ է մի մեծ, մենք գրաւոր պատասխանում ենք: Եւ նորից հանդիպում ենք ունենում այդ մեր հակափաստարկներով: Պարոն վարչապետը ասաց, որ եթէ պարզուի, որ ներկայացուած փաստարկներից թէկուզ մի կէտը կեղծ է, ներկայացնողը անմիջապէս կը պատժուի, կ’ազատուի աշխատանքից: Եւ վարչապետը շատ կարեւոր բան ասեց, որ եթէ յետագայում նաեւ կան օրէնքի թերացումներ, դրանք պէտք է համատեղ քննարկել եւ փորձել շտկել», – վարչապետի հետ հանդիպումէն մանրամասներ ներկայացուցած է Արզումանեանը:

Աւելի վաղ «Ազատութեան» հետ զրոյցի ժամանակ Նազենի Ղարիպեանը ըսած էր, որ 2017 թուականին Օրբելեանը խախտումներով զբաղեցուցած է տնօրէնի պաշտօնը: Կառավարութեան շէնքի դիմաց հաւաքուած արուեստագէտներէն շատերը սակայն ըսած են, որ չեն եկած իրաւական, քաղաքական հարց քննարկելու, այլ եկած են ներկայացնելու, թէ ինչ ստեղծագործական աճ ապրած է թատրոնը Օրբելեանի ե՛ւ տնօրէն, ե՛ւ գեղարուեստական ղեկավար աշխատած տարիներուն:

«Ազատութեան» դիտարկման, թէ արուեստագէտները այսօր կը մեղադրուին շատ այլ կարեւոր խնդիրներու ժամանակ լռելու եւ կրաւորական դիրք ընդունելու մէջ, զրուցակիցները հակադարձած են՝ իրավիճակ փոխուած է:

«Ժամանակներ են փոխուել, ինչպէս ասում են: Եւ մենք վստահ ենք, որ մեր ձայնը կը լսեն, որովհետեւ էն ժամանակ մենք ապրում էինք ի վերջոյ բոլորովին ուրիշ համակարգում, եւ բոլոր հարցերը լուծւում էին միանձնեայ, մի մարդու հրահանգով», – ըսած է Արմէն Էլբակեանը:

Օփերայի եւ պալէի արուեստագէտները խոստացած են այլեւս գործադուլի չդիմել: Ապրիլ չորսին պիտի խաղան նոր բեմադրուած «Կախարդական սրինգը» օփերան: Ներկայացման հրաւիրած են նաեւ վարչապետին:

 

Հարակից Նյութեր

Leave a Comment