Ալիեւ-Փաշինեան հանդիպման ժամկէտները յայտարարելու պահը դեռ չէ եկած, լրագրողներուն հետ զրոյցի ժամանակ յայտարարած է Հայաստանի արտաքին գործոց նախարար Զոհրապ Մնացականեանը։
«Ազատութեան» հարցին՝ «արդէն իսկ յստա՞կ են ժամկէտները Փաշինեան-Ալիեւ հանդիպման, եւ կարո՞ղ ենք ասել, որ բանակցութիւնները Մատրիտեան երեք սկզբունքների եւ վեց տարրերի շուրջ են լինելու», Մնացականեանը պատասխանած է. «Ինչ վերաբերում է ժամկէտներին եւ հանդիպմանը՝ կայ ձեւաւորուած մշակոյթ, որ մենք համաձայնեցնում ենք, աւարտում ենք ամէն ինչը, յետոյ միաժամանակ յայտարարում ենք, եւ էդ պահը դեռ չի եկել, որպէսզի մենք յայտարարենք։ Այստեղ միմեանց յարգելու խնդիրն է կողմերի միջեւ, որ մենք միաժամանակ համաձայնեցուած յայտարարում ենք հանդիպման ժամկէտների եւ վայրի մասին»։
Ինչ կը վերաբերի սկզբունքներուն՝ Մնացականեանը նշած է. «Մենք գնում ենք օրակարգով, որը արտայայտուած է շատ յստակ, ինձ թւում է, արտայայտուած է վարչապետի Ստեփանակերտում հնչեցրած ելոյթում։ Այդ մօտեցումների շուրջ եւ այդ տրամաբանութեամբ մենք ցանկանում ենք ներգրաւուել երկխօսութեան մէջ, շարունակել երկխօսութիւնը, այն ընթացքը, որ մենք ունենք։ Մենք ասում ենք, որ մենք ունենք տարբեր հարցեր»։
Արտաքին գործոց նախարարը աւելցուցած է, որ կայ ձեւաւորուած բանակցային շրջանակ՝ շարունակելով. «Այդ [Մատրիտեան] երեք տարրերը եւ վեց սկզբունքները, յիշում էք, որ վարչապետը յստակօրէն ասել է, որ կարեւոր խնդիրներից մէկը՝ թէ ինչպէ՞ս են դրանք մեկնաբանւում եւ ինչպէ՞ս են դրանք ընկալւում։ Մենք այդ առումով յստակ արտայայտել ենք, թէ ինչ գերակայութիւն ունի Հայաստանի համար սթաթուսի եւ անվտանգութեան խնդիրները, որոնք իրենց արտայայտութիւնը ունեն այդ երեք սկզբունքների եւ վեց տարրերի՝ Ձեր կողմից նշուած փաստաթղթում, որոնք յայտնի են, եւ որոնք յիշեցուեցին նաեւ վերջերս»։
«Մենք ունենք մեր մօտեցումները, որոնք վերաբերում են աւելի արդիական եւ աւելի արդիւնաւէտ եւ գործնական աշխատելու առումով՝ ինչ նշանակութիւն ունի Լեռնային Ղարաբաղի ներգրաւուածութեան եւ որոշիչ ձայնի հարցը, եւ նշել ենք, որ սա ոչ թէ պէտք է դիտուի նախապայման, այլ պէտք է դիտուի արդիւնաւէտութեանը ուղղուած գաղափար», – ընդգծած է Հայաստանի արտաքին քաղաքական գերատեսչութեան ղեկավարը:
Յիշեցնենք, որ Ատրպէյճանի արտաքին գործոց նախարար Էլմար Մամետեարովը յայտարարած է, որ Երեւանը եւ Պաքուն կը համաձայնեցնեն Հայաստանի վարչապետի եւ Ատրպէյճանի նախագահի հանդիպման օրը:
Երեքշաբթի օր Հայաստանի եւ Լեռնային Ղարաբաղի Անվտանգութեան խորհուրդներու համատեղ նիստի ժամանակ Նիկոլ Փաշինեանը վերահաստատած է տեսակէտը, որ Ղարաբաղը պէտք է ներգրաւուի բանակցային գործընթացին: Հայաստանի վարչապետը նաեւ ըսած է․ – «Համանախագահների կողմից առաջարկուած սկզբունքները, տարրերը, ինչպէս արդէն նշեցի, վերջին 10 տարիներին ամենատարբեր եւ ամենատարածական մեկնաբանութիւնների տեղիք են տուել, եւ հետեւաբար, յառաջիկայ բանակցային գործընթացի կարեւորագոյն նպատակը պէտք է լինի այսպէս ասած հիմնական հասկացութիւնների՝ երեք սկզբունքների եւ վեց տարրերի պարզաբանումը, եւ մենք պատրաստ ենք նաեւ այսպիսի խօսակցութեան»:
