Մարտ 5-ին Հայաստանի եւ Արցախի մէջ նշուեցաւ «Հոկտեմբեր 27-ի» դաւադրութեան զոհ դարձած վարչապետ Վազգէն Սարգսեանի ծննդեան 60-ամեակը:
Եռաբլուրի մէջ, սպարապետի շիրիմին այցելեցին Հայաստանի նախագահ Արմէն Սարգսեանը, Ամենայն Հայոց Կաթողիկոսը, բարձրաստիճան այլ պաշտօնեաներ, ինչպէս նաեւ նախկին իշխանութեան ներկայացուցիչներ:
Ստեփանակերտի մէջ նախագահ Բակօ Սահակեան ներկայ գտնուած է Հայաստանի ազգային հերոս, Արցախի հերոս Վազգէն Սարգսեանի 60-ամեակին նուիրուած հանդիսաւոր միջոցառման:
Ըստ Լեռնային Ղարաբաղի նախագահի պաշտօնական կայքէջին, միջոցառման մասնակցած են Հայաստանի երրորդ նախագահ Սերժ Սարգսեանը, Արցախի երկրորդ նախագահ Արկադի Ղուկասեանը, Հայ Առաքելական եկեղեցւոյ Արցախի թեմի առաջնորդ Պարգեւ արքեպիսկոպոս Մարտիրոսեանը, պետական նախարար Կրիկորի Մարտիրոսեանը, պաշտպանութեան նախարար Կարէն Աբրահամեանը, Վազգէն Սարգսեանի հարազատներն ու զինակից ընկերները, պաշտօնատար այլ անձինք:
Իր ելոյթին մէջ Բակօ Սահակեանը նշած է, որ Վազգէն Սարգսեանը այն բացառիկ ռազմական, քաղաքական ու հասարակական գործիչներէն է, որուն կը յիշեն ե՛ւ սերնդակիցները, ե՛ւ հետագայ սերունդները, կը յիշեն որպէս անձնազոհ ու անձնուէր ընկեր եւ հրամանատար, որպէս խելամիտ ու բանիմաց ղեկավար ու առաջնորդ, որպէս մեծ հայրենասէր եւ Սպարապետ:
՚Նա իր արած գործերով, իր ապրած կեանքով իսկապէս նման է լեկենտի, լեկենտ, որը կը մնայ դարերումª միշտ ոգեշնչելով ու դաստիարակելով սերունդներին, տանելով նրանց դէպի նոր յաղթանակներ: Եւ այդպէս նա կը շարունակի իրականացնել իր ազգանուէր առաքելութիւնը, իր ծառայութիւնը՝ որպէս հայրենիքի յաւերժ զինուոր», – շեշտած է Արցախի նախագահը:
