Հայաստանի Հանրապետութեան նախագահ Արմէն Սարգսեանին իր հաւատարմագրերը յանձնած է Հայաստանի մէջ Ամերիկայի Միացեալ Նահանգներու նորանշանակ արտակարգ եւ լիազօր դեսպան՝ Լին Թրէյսին:
Դեսպան Թրէյսին այս առթիւ նշած է. «Հպարտութեամբ կը յանձնեմ իմ հաւատարմագրերը նախագահին եւ կը փաստեմ, որ պատրաստ եմ աշխատելու Հայաստանի կառավարութեան հետ՝ խորացնելու եւ ամրապնդելու հայ-ամերիկեան յարաբերութիւնները եւ աջակցելու Հայաստանի ժողովրդավարական օրակարգին»:
Շնորհաւորելով դեսպանը պաշտօնը ստանձնելու առթիւ՝ նախագահ Սարգսեանը ըսած է, որ Հայաստան մեծապէս կը կարեւորէ ընդհանուր արժէքներու եւ փոխադարձ յարգանքի ու վստահութեան վրայ հիմնուած հայ-ամերիկեան բարեկամութիւնն ու գործընկերութիւնը: Նախագահը համոզմունք յայտնած է, որ նորանշանակ դեսպանը իր հարուստ փորձառութիւնն ու գիտելիքները պիտի ներդնէ՝ երկու երկիրներու միջեւ բազմաոլորտ համագործակցութեան առաւել զարգացման համար: