Նիկոլ Փաշինեանը, որպէս պետութեան ղեկավար, ներողութիւն խնդրեց տասը զոհերէն: 2008-ին ընդդիմութեան առաջնորդներէն Նիկոլ Փաշինեանը, որ յեղափոխութեան շնորհիւ այսօր երկրի վարչապետն է, վստահեցուցած է՝ վերադարձ անցեալի բարքերուն պիտի չըլլայ:
«Արձանագրելու համար մեր համընդհանուր հաւատարմութիւնը 2018 թուականի գարնանը տեղի ունեցած ոչ բռնի, թաւշեայ, ժողովրդական յեղափոխութեան արժէքներին, որպէս Հայաստանի Հանրապետութեան ղեկավար՝ պետութեան անունից ներողութիւն եմ խնդրում 2008 թուականի Մարտի 1-ի բոլոր զոհերից, անկախութիւնից ի վեր Հայաստանում տեղի ունեցած բոլոր քաղաքական սպանութիւնների զոհերից, քաղաքական հետապնդման ենթարկուած բոլոր քաղաքացիներից ու քաղաքական ուժերից: Ներողութիւն եմ խնդրում նաեւ Հայաստանում տեղի ունեցած բոլոր ընտրակեղծիքների, իշխանութեան վերնախաւի կողմից կազմակերպուած եւ համակարգուած ապօրինութիւնների, կաշառակերութեան, քաղաքական սպանութիւնների համար՝ արձանագրելով, որ բռնութիւնով հարցեր լուծելու էջը փակուած է Հայաստանում, եւ այսպէս եմ ընկալում քաղաքացիների կողմից մեզ տրուած վստահութեան քուէն», – ըսած է Փաշինեանը՝ հաւաստիացնելիով․ – «Եւ այսօր՝ 2019 թուականի Մարտի 1-ին, ուզում եմ յստակ արձանագրել, որ վերադարձ անցեալի բարքերին ու յարաբերութիւններին չի կարող լինել: Հայաստանը չի վերադառնալու փտածութեան, քաղաքական հետապնդումների, քաղաքական բռնութիւնների, իրաւունքների արհամարհման ու ոտնահարման, ամենաթողութեան ու լկտիութեան ժամանակներին»:
Գնահատելով 2008-ի իրադարձութիւնները՝ վարչապետը ըսած է, որ այդ բռնութիւններու ու ապօրինութիւններու միակ թիրախը Հայաստանի քաղաքացին էր․ – «Մարտի 1-ի զոհերից իւրաքանչիւրի վրայ արձակուած կրակոցը մեզնից իւրաքանչիւրի վրայ արձակուած կրակոց է: 2008 թուականի մարտի 1-ը, սակայն, այդ օրը առաւօտեան ծագած երեւոյթ չէր պարզապէս, այլ երկար տարիներ Հայաստանն ու նրա ժողովրդին կեղեքող ապօրինութիւնների, ընտրակեղծիքների, քաղաքական սպանութիւնների, հետապնդումների, ամենաթողութեան խտացուած ժայթքում»:
Նիկոլ Փաշինեանը մարտիմէկեան իր ուղերձին մէջ շեշտած է, որ հիմա նոր իշխանութեան առաքելութիւնն է՝ Հայաստանը իրաւունքի ու արդարութեան երկիր դարձնել․ – «Եւ այդ առաքելութիւնից մենք չենք շեղուելու ոչ մի միլիմեթր: Սա չի նշանակում, թէ այսօրուայ Հայաստանում այլեւս չկան ապօրինութիւնների, իրաւունքների ոտնահարման, նոյնիսկ կաշառքի ու բռնութեան դէպքեր: Նման դէպքեր, ցաւօք սրտի, դեռ կան, կարող են լինել: Բայց իւրաքանչիւր քաղաքացի պէտք է հարիւր տոկոսով վստահ լինի, որ կառավարութիւնը, վարչապետը որեւէ ապօրինութեան ոչ թէ հովանաւորն է ու համակարգողը, այլ հակառակորդը ու հակոտնեան: Ապօրինութիւնների, իրաւունքների ոտնահարումների, չարաշահումների դէմ պայքարում, իշխանութեան վերնախաւի կողմից թոյլ տրուած յանցագործութիւնների բացայայտման գործում մենք յաղթելու ենք անխուսափելիօրէն»:
«Սիրելի՛ հայրենակիցներ: Այսօր գարուն է: Այս գարունը դուք էք բերել Հայաստանին», – իր ուղերձը եզրափակած է վարչապետ Նիկոլ Փաշինեանը:
