Հայաստանի մէջ Եւրոմիութեան պատուիրակութեան ղեկավար, դեսպան Փիոթր Սվիթալսքին մամուլի հետ հանդիպման ընթացքին նշած է թէ, արդէն իսկ լուրջ առաջընթաց կը տեսնեն կաշառակերութեան դէմ պայքարին մէջ, բայց, աւելցուցած է, պայքարը դեռ երկարատեւ պիտի ըլլայ: Դեսպանը անդրադարձած է շարք մը ներքաղաքական խնդիրներու, խօսած է նաեւ Հայաստան-Եւրոմիութիւն յարաբերութիւններու զարգացման մասին:
Կաշառակերութեան դէմ պայքարի մասով Սվիթալսքին իր խօսքին մէջ ընդգծած է՝ ոչ միայն Հայաստանի քաղաքացիները, այլ նաեւ Հայաստանի գործընկերները կը նկատենª կաշառակերութեան դէմ պայքարի համար հիմա կայ քաղաքական կամք:
«Բայց քաղաքական կամքը, ըլլալով պարտադիր, դեռ բաւարար չէ, անհրաժեշտ են այլ տարրեր, մասնաւորապէս՝ հաստատութիւններ, օրէնքներ եւ հանրային մշակոյթ կամ միջավայր: Հաստատութիւններու մասով, մենք կը տեսնենք, որ կառավարութիւնը կ’ուզէ ստեղծել նոր, անկախ հակակաշառակերային գերատեսչութիւն, կեդրոն, որ ունենայ ամբողջական լիազօրութիւններ: Երկրորդը՝ Հայաստանին անհրաժեշտ են նոր օրէնքներ, եւ եթէ դուք նայիք կառավարութեան ծրագիրը, արդէն որոշակի օրէնսդրական նախաձեռնութիւններ այնտեղ ամրագրուած են, ինչը լաւ նշան է: Եւ, ի վերջոյ, Հայաստանին անհրաժեշտ է հանրային աջակցութիւն, այսինքն՝ հանրային անհանդուրժողականութիւն կաշառակերութեան նկատմամբ: Եւ դարձեալ, եթէ մեզի դիմեն օգնելու, մենք պատրաստ ենք, բայց նախաձեռնութիւնը պէտք է ըլլայ հայկական կողմինը», – ըսած է Սվիթալսքին՝ շարունակելով. – «Այդուհանդերձ, ես կը կարծեմ, որ մենք արդէն իսկ լուրջ առաջընթաց տեսած ենք կաշառակերութեան դէմ պայքարին մէջ, բայց եկէք պատրանքներ չունենանք: Եթէ մենք մեր շուրջը նայինք, Եւրոմիութեան այլ երկրներու փորձը ուսումնասիրենք, կը տեսնենք, որ սա երկարաժամկէտ եւ չաւարտող պայքար է: Այսինքն, ձեր դափնիի տերեւներուն վրայ մի հանգստանաք, ճանապարհը շատ երկար է»:
Անդրադառնալով Եւրոմիութեան նիւթական աջակցութեան Հայաստանին՝ դեսպանը իր խօսքին մէջ ակնարկած է՝ յառաջիկային այն պիտի աւելնայ: Դեսպանի խօսքով՝ Եւրոմիութիւնը բարձր կը գնահատէ ժողովրդավարական բարեփոխումներու ընթացքը, եւ այժմ հայաստանեան գործընկերներուն հետ կը քննարկեն յստակ գործողութիւններու ծրագիր: