Պոլսոյ Պալաթ թաղամասին մէջ գտնուող Սուրբ Հրեշտակապետ եկեղեցւոյ պատին ցեղապաշտական բնոյթի գրառումներ յայտնուած են:
Այս մասին, ինչպէս կը հաղորդէ «Արմէնբրես»–ը, կը տեղեկանանք Թուրքիոյ մէջ գործող հայկական «Լոյս» ամսագրի պլոկէն:
Եկեղեցւոյ կառավարող խորհուրդը դէպքի առթիւ հաղորդագրութիւն ներկայացուցած է ոստիկանութեան:
Հայոց պատրիարքութեան տարածած հաղորդագրութեան մէջ նշուած է, որ յիշեալ գրութիւնները անգլերէն եւ արաբերէն են։
Գրառում կատարած անձերու ինքնութիւնը դեռ չէ պարզուած:
Թուրքիոյ քրտամէտ «Ժողովուրդներու դեմոկրատական կուսակցութեան» Տիարպէքիրէն ընտրուած հայ պատգամաւոր Կարօ Փայլանը անդրադարձած է Պալաթ թաղամասին մէջ հայկական եկեղեցւոյ վրայ եղած գրառումներուն:
Ան Twitter-ի իր էջին հետեւեալ գրառումը ըրած է.
«Պալաթի Սուրբ Հրեշտակապետ հայկական եկեղեցին յայտնուած է ատելութեան թիրախ: Ամէն տարի բազմաթիւ եկեղեցիներ եւ սինակոկներ ատելութեան թիրախ կը դառնան: Ոչ միայն պէտք է պարզել, թէ ովքեր են այդ թշնամական պահուածքի հեղինակները, այլեւ պարզել, թէ ինչ ուժեր կանգնած են անոնց ետին»:
Պատգամաւորը ամփոփելով խօսքը նշած է. «Ամենակարեւորը այն է, որ պէտք է վերջ տալ ատելութիւն ծնող քաղաքականութեան»
Նշենք, որ քրիստոնէական շինութիւններու եւ եկեղեցիներու պատերուն ատելութիւն պարունակող եւ ցեղապաշտական բնոյթի գրառումներ Թուրքիոյ մէջ յաճախ կը կտարուին:
